काठमाडौं (हाम्रो खेलकुद)– मनाङ मस्र्याङ्दी क्लबले कतार एयरवेज सहिद स्मारक ए डिभिजन लिगको शीर्षस्थानमा पुनरागमन गर्ने मौका गुमाएको छ । १० खेलाडीमा सिमित मनाङले शनिबार यति हिमालयन शेर्पा क्लबसँग गोलरहित बराबरी खेलेपछि अग्रस्थानमा पुग्ने अवसर गुमाएको छ ।

बराबरी १२ अंक भएपनि त्रिभुवन आर्मी क्लबलाई हेड टु हेडमा पछि पार्दै मनाङ दोस्रो स्थानमा उक्लेको छ । शनिबार नै पहिलो खेलमा खेलमा सानमिगेल मछिन्द्र क्लबले प्रभु बैंक जावलाखेल क्लबलाई १–० ले हराउँदै मछिन्द्र अंक तालिकाको शीर्षस्थानमा उक्लेको छ । ६ खेलमा मछिन्द्रको १३ अंक पुगेको छ । विशाल राईको गोलमा मछिन्द्रले जित निकालेको थियो ।

पहिलो हाफमा मनाङले गोल गर्ने अवसर पाएर पनि सदुपयोग गर्न सकने । २५ औं मिनेटमा विमल रानाले मैदानमा बायाँबाट चलाखीपूर्ण क्रस गर्दा फेमि जोसुवाको वान टच प्रहारलाई शेर्पाका कप्तान मानबहादुर तामााङले क्लियर गरे । फेमिले विपक्षी गोलकिपर विट भैसकेको अवस्थामा प्रहार गर्न पनि सफल हुन सकेनन् । शेर्पाले भने मनाङको पोष्टमा खासै आकमर्ण गर्न सकेन ।

५०औं मिनेटमा शेर्पाले गोल गर्ने सुन्दर मौका गुमायो ।त्रिदेव गुरुङको क्रसमा अलरिच सिवेको हेडर गोलरक्षक दिप कार्कीले टप कर्नरमा सहजै बचाए । ५६ औं मिनेटमा विनोद गुरुङको प्रहार मनाङका गोलरक्षक दिपले मुस्किलले बचाए । ७० औंं मिनेटमा मनाङका अन्जन बिष्टको पासमा सुशील लामाको प्रहार गोलरक्षक किशोर गिरीले बचाए । लगत्तै रिवाउन्डमा लुइस भिडालको प्रहारलाई पनि विफल पारिदिए ।

लगत्तै लुइसकै प्रहारलाई गोलरक्षक किशोरले बचाए । ७३ औं मिनेटमा मनाङ १० खेलाडीमा समेटियो । स्टेफेन समिर लाई फल गरेपछि रेफ्री प्रकाशनाथ श्रेष्ठले सुरज विकलाई सिधै रातो कार्ड देखाएपछि मनाङ १० खेलाडीमा सिमित भएको थियो । त्यसमै प्राप्त फ्रिकिक आकासियो ।

८२ औं मिनेटमा विमलको प्रहार गोलरक्षक किशोर जोगाए । ८७ औं मिनेटमा शेर्पाका सुरज हमालको प्रहार फितलो बन्यो । इन्ज्युरी समयकाे थप गरिएकाे पहिलाे मिनेटमा विमल वान भर्सेस वानमा चुक्दा मनाङले अग्रता लिनबाट चुक्याे । लगत्तै शेर्पाका सुरज हमालले गाेल गर्न सकेनन् । शेर्पाको ६ खेलमा ४ अंक पुगेको छ ।