काठमाडौं (हाम्रो खेलकुद)– सानमिगेल मछिन्द्र क्लबले कतार एयरवेज सहिद स्मारक ए डिभिजन लिगमा शनिबार प्रभु बैंक जावलाखेल क्लबविरुद्धको पहिलो हाफमा १–० को अग्रता लिएको छ ।

दशरथ रंगशालामा विशाल राईको गोलबाट मछिन्द्रले ३१ औं मिनेटमा खेलमा अग्रता लिएको हो । टोलीले थप गोलको अवसर पाए पनि सफल भने भए । १५ औं मिनेटमा मछिन्द्रका रन्जित धिमालको फ्रिकिक बाहिरियो । ४० औं मिनेटमा रेजिन सुब्बाको प्रहार पोष्ट नजिकबाट बाहििरयो । ४३ औं रेजिनले गरेको गोललाई रेफ्रीले अफसाइड लिए । जावलाखेलका लागि २४ औं मिनेटमा हरि कठायतको प्रहार मछिन्द्रका गोलकिपर विशाल श्रेष्ठले रोके ।

पाँच चरणको समाप्ती सम्म आइपुग्दा मछिन्द्र र जावलाखेल अपराजित रहेका छन् । लिग जित्ने योजना बनाएको मछिन्द्रलाई उपाधि जित्ने सम्भवना जीवितै राख्न जावलाखेललाई पराजित गर्ने दाउमा हुनेछ । मछिन्द्रले ३ जित र २ बराबरीको नतिजासहित १० अंक जोडेर तेस्रो स्थानमा छ । गत सिजन अंक तालिकाको पुछारबाट दोस्रोमा रहेको मछिन्द्रको यो सिजन एक अंक घटाइएको छ ।

गत सोमबार मनाङविरुद्वको खेल सकिए लगत्तै विवादमा उत्रिएका स्ट्राइकर दीपक राई, डिफेन्डर देवेन्द्र तामाङ र विजय धिमाललाई कारबाहीमा छन् । तीनै खेलाडीले लिगको दुई खेल गुमाउनेछन् । जावलाखेल तीन मुख्य खेलाडी प्रतिबन्धमा रहेको फाइदा उठाउदै मछिन्द्रलाई स्तब्ध पार्ने लक्ष्यमा हुनेछ । लिगमा अपराजित रहेको जावलाखेल २ जित र ३ बराबरीको नतिजासहित ९ जोडेर पाचौं स्थानमा छ ।