काठमाडौं (हाम्रो खेलकुद)– कतार एयरवेज सहिद स्मारक ए डिभिजन लिगमा दबाबमा रहेका दुई टोलीबीचको प्रतिस्पर्धामा संकटा क्लबले बाजी मारेको छ । दशरथ रंगशालामा बिहीबार भएको खेलमा संकटाले नेपाल एपिएफ क्लबलाई ४–२ ले हराएको छ ।

पाँचौं खेलमा दोस्रो जित निकालेको संकटाको खातामा अब ७ अंक पुगेको छ । एपिएफको ५ खेलमा ४ अंक छ । संकटाका लागि अजयी मार्टिन्सले २ तथा लक्ष्मण रुचाल र कर्ण लिम्बुले गोल गरेका थिए । एपिएफका लागि नवीन लामा र आशिष लामाले गोल गरेका थिए ।

संकटाले एपिएफविरुद्ध पहिलो हाफमै २–० को अग्रता लिएको थियो । लक्ष्मण रुचालले १९ औं मिनेटमा गोल गर्दै अग्रता दिलाएका थिए । उनले भन्डै ३५ यार्डबाट फ्रिकिकमा गोल गरेका थिए । ४४ औं मिनेटमा कर्ण लिम्बुले अन्तरलाई दोब्बर पारे ।

५३ औं मिनेटमा अजायी मार्टिनले गोल गरेपछि संकटाको अग्रता ३–० बनेको थियो । सुवास गुरुङको क्रसमा विपक्षी गोलकिपर अमृत चौधरीले पन्चगरेपछि पोष्ट नजिक रहेका मार्टिन्सले गोल गरेका थिए ।

जारी लिगको हाइ स्कोरिङ खेलमा एपिएफका नवीन लामाले गोल पेनाल्टीमा गोल गर्दै अन्तरलाई घटाएका थिए । ७२ औं मिनेटमा एपिएफका आशिष लामाले गोल फर्काएपछि खेल थप रोचक बनेको थियो । पेनाल्टी बक्स बाहिरबाट उनले गरेको प्रहार सोझै गोलमा परिणत भएको थियो । आशिषको प्रहारमा संकटाका गोलकिपर विनय श्रेष्ठले रोक्ने कुनै मौका पाएनन् ।

खेल सकिन २ मिनेट बाँकी रहँदा मार्टिन्सले अर्को गोल थपेपछि संकटाको जित निश्चित बनेको थियो । मार्टिन्सको प्रहारलाई गोलकपिर अमृतले रोक्ने प्रयास गरेपछि सफल भएनन् ।

दशरथ रंगशालामा दिउँसो ३ः०० बजे सुरु हुने खेलमा त्रिभुवन आर्मी क्लबले सरस्वती क्लबको सामना गर्नेछ । सरस्वतीलाई हराउन सके आर्मी अंक तालिको शीर्षस्थनमा उक्लनेछ । त्यो खेल लिगको पाँचौं चरणअन्तर्गतको अन्तिम खेल पनि हो ।