काठमाडौं (हाम्रो खेलकुद)– च्यासल युथ क्लबका कप्तान सन्तोष साहुखलले लिगमा एक सय गोल पुरा गरेको कतार एयरवेज सहिद स्मारक ए डिभिजन लिगअन्तर्गत बुधबारको खेलमा टोलीले बराबर खेलेको छ । २ पटक सम्म खेलमा पछि परेर पनि च्यासल नेपाल पुलिस क्लबसँग २–२ को बराबरी खेल्न सफल भएको थियो ।

पहिलो हाफमा पुलिसले लिएको २–१ ले लिएको अग्रतालाई दोस्रो हाफमा जोगाउन सकेन । दोस्रो हाफको चौथो मिनेटमा सन्तोषले बराबरी गोल फर्काएका थिए । हेमन्त थापा मगरले दिएको क्रसमा हुलमुलका बीचबाट सन्तोषले गोल गरेका थिए ।

त्यसअघि दशरथ रंगशालामा निरकुमार राईको गोलबाट पुलिसले खेलको पाँचौं मिनेटमा अग्रता लिएको थियो । विपक्षी रक्षकहरु अलर्ट नभएको अवस्थामा पेनाल्टी बक्समा प्राप्त बलमा नीरकुमारले गोल गरेका थिए । तर, १८ औं मिनेटमा कप्तान सन्तोषले बराबरी गोल गर्दै च्यासललाई खेलमा फर्काएका थिए । त्यो उनको एतिहासिक गोल थियो । लिगमा त्यो उनको सयौं गोल थियो । लिगमा एक सय गोल पुरा गर्ने उनी पहिलो नेपाली खेलाडी हुन् ।

तर पहिलो हाफको अन्त्यमा पुलिसले सुमन लामाको गोलबाट पुन अग्रता लिएको थियो । सुमनले ४० औं मिनेटमा गोल गरेका थिए । दोस्रो हाफमा सन्तोषले ह्याट्रिक पुरा गर्ने केहि अवसर पाए पनि सफल हुन सकेनन् । उनले डेढ दशक लामो खेल जीवनमा सय गोल पुरा गरेका हुन् । जारी लिगको सुरुवाती दुई खेलमा ३ गोल गरेका सन्तोषले पछिल्लो दुई खेलमा भने गोल गर्न सकेका थिएनन् ।