काठमाडौं (हाम्रो खेलकुद)– सहिद स्मारक ए डिभिजन लिगमा बुधबार ब्रिगेड ब्वाइज क्लब (बिबिसी) विरुद्धको पहिलो हाफमा रुस्लान थ्री स्टार क्लबले २–० को अग्रता लिएको छ । थ्री स्टारका लागि सुसान श्रेष्ठ र अनन्त तामाङले गोल गरेका थिए ।

१४ औं मिनेटमा सुसान श्रेष्ठको गोलमा थ्री स्टारले अग्रता लिएको थियो । अशोक खवासको पासमा सुसानले सिक्स यार्ड बक्स भित्रबाट सहज गोल गरेका थिए । ४१ औं मिनेटमा अनन्तले गोल गरेका थिए । मिक्छेन तामाङको कर्नरमा अनन्तले हेडमार्फत गोल गरेका थिए ।
अघिल्लो खेलमा त्रिभुवन आर्मी क्लबसँग २–० को हार बेहोरेको थ्री स्टारले आज पहिलो हाफमै अग्रता लिएको छ ।
आठौ मिनेटमा थ्री स्टारका मिक्छेन तामाङको कर्नर पासमा दिपेश घलेले उपलब्ध गराएको क्रस पासमा कप्तान विक्रम लामाको हेडर पोष्टबाट थोरै बाहिरियो । लगत्तै नवौं मिनेटमा सुसानले गोलरक्षक अघि बढेको अव्सथामा वान भर्सेस वानमा गोलरक्षक विशाल सुनारलाई बिट गर्दै गरेको चिप प्रहारलाई बीबीसीका डिफेन्डर मनोज राईले गोललाईनबाट बचाउदा थ्री स्टार अग्रता लिनबाट चुक्यो ।
२८औं मिनेटमा दिपेशले गोल गर्ने सुन्दर मौका गुमायो । हम्जातको पासलाई नियन्त्रणमा लिदै गरेको प्रहारलाई गोलरक्षक विशालले बचाएपनि दोस्रो प्रयास आकासियो । २९औं मिनेटमा बीबीसीका पदम भट्टराईको प्रहार पोस्टबाट थोरै बाहिरिदा बराबरीबाट चुक्यो ।