काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिग अन्तरगतको पाँचौं चरणको तेस्रो दिन आज दुई खेलमा प्रतिस्पर्धा हुदैछ ।

दशरथ रंगशालामा हुने दिनको पहिलो खेलमा ब्रिगेड ब्वाइज क्लब (बीबीसी) र रुस्लान थ्री स्टार क्लबबीच मध्यान्ह १२ बजे प्रतिस्पर्धा हुनेछ । च्यासल युथ क्लब र विभागीय नेपाल पुलिस क्लबबीच दिउँसो ३ बजे एक अर्कोको सामना गर्दैछन् ।

उपाधि दाबेदारीलाई यथावत राख्न थ्री स्टारलाई जितको आवश्यकता छ । दुवै टोली जित्ने लक्ष्यमा नै मैदान उत्रनेछ ।गतवर्ष राष्ट्रिय खेलाडीले भरिएको थ्री स्टारले बीबीसीलाई ५–१ को भारी अन्तरले पराजित गरेको थियो । तर, यसपटक थ्री स्टार युवा खेलाडीलाई विश्वास गर्दै लिग खेलिरहेको छ । थ्री स्टारले लिगमा औसतको प्रदर्शन गरिरहेको छ ।

थ्री स्टार भने बीबीसीलाई हराउँदै पुरानै लयमा फर्कन चाहन्छ । थ्री स्टार चौथो चरणमा आर्मीसँग २–० ले पराजित भएको थियो । पहिलो खेलमा जावलाखेल युथसँग गोलरहित बराबरीमा रोकिएको थ्र्रीस्टारले दोस्रो खेलमा नेपाल पुलिस क्लबलाई तथा एपीएफलाई १–० ले पराजित गरेको थियो ।

यू–१९ राष्ट्रिय टिमका पुर्व मिडफिल्डर तथा फरवार्ड शिव सुवेदीको आगमनले थ्री स्टारको अग्रपङ्ति बलियो हुने आँकलन गरिएको छ । भारतीय सैनिकमा रहेका शिवलाई थ्री स्टारले दुई दिन अघि मात्रै क्लबमा अनबन्धित गरेको थियो । थ्री स्टार ७ अंकसहित पाँचौं स्थानमा छ ।

यता, अधिकांश पुरानै खेलाडी र केही अनुभवी र भेट्रान खेलाडी समावेश गरेर सन्तुलित टिम बनाएको बीबीसी अघिल्लो सिजन थ्री स्टारसंग ब्यहोरेको हारको बदला लिने दाउमा हुनेछ । बीबीसीले हिमालयन शेर्पालाई १–० ले तथा फ्रेन्ड्सलाई २–० ले पराजित गरेको छ । मछिन्द्रसँग २–० ले तथा मनाङसँग १–० ले पराजित भएको थियो । बीबीसी ६ अंकसहित सातौं स्थानमा छ ।

आज सन्तोषले सय गोल पुर्याउलान ?

ठीक उल्टो लिगको सुरुवाती दुई खेलमा प्रभावशाली जित निकालेको च्यासलले तेस्रो खेलबाट लय गुमाएको छ । यता, पुलिसले औसत शुरुवात गरेपछि पछिल्लो दुई खेलमा जित निकाल्दै पुलिस जितको लयमा फर्किएको छ ।

सन्तोष साहुखलको शतक गोलको प्रतीक्षामा रहेको च्यासलको पछिल्लो प्रर्दशन अपेक्षित छैन । सन्तोषले सुरुवाती खेलमा च्यासललाई जित दिलाउँदै घरेलु लिग फुटबलमा शतक गोलको नजिक पुगेका छन् । सुरुवाती २ खेलमा ३ गोल गर्दै सय गोलको नजिक पुगेका सन्तोष पछिल्लो २ खेलमा गोल विहिन छन् ।

तर विपक्षी टिम सन्तोषको सय गोलमा रोक्न केन्द्रित हुँदा च्यासलमाथि दबाब थपिएको छ । अन्य खेलाडी त्यसको फाईदा उठाउन सकिरहेका छैनन् । दुवै टिम जितका लागि नै मैदानमा उत्रनेछ । पुलिस तेस्रो तथा च्यासल दोस्रो जितको खोजीमा हुनेछ । च्यासललाई भने पुलिससँग गत बर्ष लिगमा ब्यहोरेको हारको बदला लिने अवसर छ ।