एजेन्सी – रियल म्याड्रिडका बेल्जियन मिडफिल्डर इडेन हाजार्डले यसै महिना साउदी अरेबियामा हुने नयाँ स्वरूपको स्पेनिस सुपरकप गुमाउने भएका छन् ।

यसै सिजन चेल्सीबाट रियल आएका हाजार्डले अपेक्षित सुरुवात गर्न सकेका छैनन् । ला लिगामा ८ खेल मात्र खेलेका उनले १ गोल मात्र गर्न सकेका छन् । च्याम्पियन्स लिगमा पीएसजीविरुद्ध खेलमा चोट बोकेपछि उनी मैदानबाहिर रहँदै आएका छन् ।

रियलले लिगमा यो साता गेटाफेको सामना गर्दैछ । लगत्तै हुने स्पेनिस सुपरकपमा ४ टोलीको सहभागिता रहनेछ । जनवरी ८ देखि हुने प्रतियोगिता साउदी अरेबियामा हुँदैछ । रियलका प्रशिक्षक जिनेदिन जिदानले उक्त प्रतियोगिताका लागि हाजार्ड टोलीसँग नहुने पक्का गरेका छन् ।

‘ हाजार्ड सुपरकप खेल्ने टोलीमा छैनन् । उनी अहिले चोटमुक्त हुने प्रक्रियामा छन् । अहिले नै जोखिम उठाउने अवस्था छैन,’ जिदानले भने, ‘ सुपरकपपछि उनको अवस्था हेरेर टोलीमा बिस्तारै समेट्ने छौं । हरेक खेलाडीको महत्त्व छ र उनी हाम्रो लागि महत्त्वपूर्ण खेलाडी हुन् ।’

रियलले सुपरकपको सेमिफाइनल खेलमा भ्यालेन्सियाको सामना गर्नेछ । अर्को सेमिफाइनलमा बार्सिलोना र एटलेटिको म्याड्रिडले प्रतिस्पर्धा गर्नेछन् । हालसम्म रियलले १० पटक सुपरकप उपाधि जितिसकेको छ ।

ला लिगामा रियल म्याड्रिड दोस्रो स्थानमा रहेको छ । शीर्षस्थानको बार्सिलोनाभन्दा २ अंकले पछाडी रहेको रियलले तेस्रो स्थानको सेभिल्लासँग २ अंकको अग्रता बनाएको छ । रियलले सुपरकपपछि सेभुल्ला, रियल भालाडोलिड र एटलेटिको म्याड्रिडसँग लगातार खेल्नेछ ।