काठमाडौं (हाम्रो खेलकुद) – खराब मौसमको कारण देखाउदै अखिल नेपाल फुटबल संघ (एन्फा) ले कतार एयरवेज सहिद स्मारक ‘ए’ डिभिजन लिग अन्तरगतको पाँचौ राउन्डको खेलहरु २ दिन स्थगित गरेको छ । दशरथ रंगशालामा शनिबारबाट तय गरिएको पाँचौ चरणका खेलहरु अब सोमबारदेखि बिहीबारसम्म चल्नेछन । यसअघिको तालिकामा शनिबारदेखि मंगलबारसम्मको लागि तय थियो ।

अखिल नेपाल फुटबल संघ (एन्फा)को लिग कमिटिको आकस्मिक बैठकले बिहीबार साँझ देखि नै लगातार हल्का वर्षा भइरहेको र वर्षा अझै जारी रहने सम्भावना रहेकोले लिगका खेलहरु दुई दिन पछि सार्ने निर्णय गरेको हो । पाँचौ चरणको अब नयाँ तािलका अनुसार पहिलो दिन सोमबार न्युरोड टिम (एनआरटी) र प्रभु बैंक जावलाखेल युथ क्लब तथा उपाधिका दुई दाबेदार मनाङ–मस्र्याङ्दी क्लब र सानमिगेल मछिन्द्र क्लबबीच खेल तय हुनेछ ।

त्यस्तै मंगलबार यति हिमालयन शेर्पा र फ्रेन्ड्स क्लब, बुधबार बीबीसी र रुस्लान थ्री स्टार क्लब तथा च्यासल युथ क्लब र नेपाल पुलिस क्लब बीच हुनेछ । बिहीबार संकटा र एपीएफ तथा त्रिभुवन आर्मी क्लब र सरस्वती क्लबबीच प्रतिस्पर्धा हुनेछ । पाँचौं चरणका सबै खेल दशरथ रंगशाला हुनेछ ।

लिगको चौथो चरण सकिदा अपराजित रहेको मनाङ १० अंकसहित शीर्षस्थानमा रहेको छ । समान ९ अंक जोडेका मछिन्द्र दोस्रो र आर्मी तेस्रो स्थानमा छ । ८ अंक जोडेको जावलाखेल चौथो, पुलिस पाँचौ, थ्री स्टार छैटौ, बीबीसी सातौ, एनआरटी आठौं, च्यासल नवौं, एपीएफ १०औं, संकटा ११औं, शेर्पा १२औं तथा फ्रेन्ड्स १३औं स्थानमा छ । अंकविहीन सरस्वती पुछारमा छ ।