एजेन्सी – लेस्टर सिटीले यो सिजन उच्च प्रदर्शनलाई निरन्तरता दिदा बुधबार राति न्यु क्यासल युनाइटेडमाथि सहज जित निकालेको छ । लेस्टरले न्यु क्यासलमाथि उसकै मैदानमा ३–० को सहज जित निकालेको हो ।

२०१५÷१६ को च्याम्पियन लेस्टर सिटीले यो सिजन २१ मध्ये १४ खेलमा जित निकालेको छ । ३ बराबरी र ४ हारको नतिजा छ । लेस्टरको जितमा एयोजी पेरेज, जेम्स म्याडिसन र हम्जा चौधरीले गोल गरे । खेलभर नै घरेलु टोलीलाई दवावमा राखेको लेस्टरले खेको ३६औं मिनेटमा एयोजी पेरेजको गोलबाट खेलमा अग्रता बनाएको थियो । फ्लोरेन लिजुनेको ब्याक पासलाई चलाखीपुर्ण तरिका नियन्त्रणमा लिदै एयोजीले आफ्नै पुर्व क्लबविरुद्ध गोल गर्न सफल भए ।

३९औं मिनेटमा जेम्स म्याडिसननले एयोजी पेरेजको पासमा गोल गर्दै लेस्टरलाई पहिलो हाफमा २–० को अग्रता दिलाए ।  ८७औं मिनेटमा वैकल्पिक खेलाडी हम्जा चौधरीले गोल गर्दै लेस्टरलाई ३–० को सहज जित दिलाए । हम्जा ७७औं मिनेटमा जेम्स म्याडिसनको स्थानमा मैदानमा प्रवेश गरेका थिए ।

जितसँगै लेस्टरले शीर्षस्थानको लिभरपुलसँगको अंक दुरी छोट्याएको छ । लेस्टरको २१ खेलबाट ४५ अंक रहेको छ । दुई खेल कम खेलेको लिभरपुलको ५५ अंक छ । पराजित न्यु क्यासल २५ अंकसहित १३औं स्थानमा छ ।

प्रिमियर लिगकै अर्काे खेलमा टोटेनहम हस्टपर साउथह्याम्पटनसँग १–० ले पराजित भएको छ । ड्यानी इंग्सले खेलको १७औं मिनेटमा गरेको गोल नै साउथह्याम्पटनले टोटेनहमलाई पराजित गर्न पर्याप्त बन्यो । जितपछि साउथ ह्याम्पटन २५ अंकसहित १२औं स्थानमा उक्लदा टोटेनहम छैटौ स्थानमा यथावत छ ।