एजेन्सी – लन्डन क्लब आर्सनलले प्रिमियर लिगमा पाँच खेलपछि जित निकाल्ने क्रममा बुधबार राति म्यानचेस्टर युनाइटेडलाई पराजित गरेको छ । आर्सनलले घरेलु मैदानमा युनाइटेडमाथि २–० को जित निकालेको हो ।

१० डिसेम्वरमा वेस्ट ह्याम युनाइटेडमाथि ३–१ को जित निकाले यता आर्सनलले प्रिमियर लिगमा जित निकाल्न सकेको थिएन । यसक्रममा आसर्नल म्यानचेस्टर सिटी र चेल्सीसँग पराजित हुदा एभर्टन र बर्नमाउथसँग बराबरीमा रोकिएको थियो ।

आर्सनलको जितमा निकोलस पेपे र सोक्राटिसले गोल गरे । दुवै गोल पहिलो हाफमा सम्भव भएको थियो । खेलको आठौं मिनेटमा नै पेपेले गोल गर्दै आर्सनललाई अग्रता दिलाए ।  ४२औं मिनेटमा सोक्राटिससले गोल गर्दै आर्सनललाई पहिलो हाफमा २–० ले अघि बढाए ।

पेपेको कर्नरमा लाकाजेटीले फ्लिक गरेको बललाई सोक्राटिसले जाली चुमाएका थिए । पहिलो हाफमा २–० ले पछि परेपछि युनाइटेडले घरेलु टोलीलाई दवावमा राखेपनि गोल गर्न नसक्दा पराजित हुन पुग्यो ।

जितपछि आर्सनल २१ खेलबाट २७ अंक जोडेर १०औं स्थानमा उक्लदा युनाइटेड समान खेलबाटै ३१ अंक जोडेर पाँचौ स्थानमा यथावत रहेको छ ।  लिभरपुल १९ खेलबाट ५५ अंक जोडेर शीर्षस्थानमा रहँदा ४५ अंक जोड्दै लेस्टर सिटी दोस्रो स्थानमा रहेको छ । सिटी ४४ अंकसहित तेस्रो तथा ३६ अंक जोडेको चेल्सी चौथो स्थानमा रहेको छ ।