काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिगमा आज (बुधबार) चौथो चरणको खेल अन्तरगतको तेस्रो दिन दुई खेल हुँदैछन् ।

सातदोबाटोस्थित एन्फा कम्प्लेक्समा बुधबार पहिलो खेलमा गतवर्षको उपविजेता संकटा क्लब र विभागीय नेपाल पुलिस क्लब तथा दोस्रो खेलमा विभागीय त्रिभुवन आर्मी क्लब र रुस्लान थ्रीस्टार क्लबबीच प्रतिस्पर्धा हुनेछ । खेल बिहान ११ः३० बजे र दिउँसो ३ बजेपछि हुनेछ । गत सिजनको उपविजेता संकटा र विभागीय टोली नेपाल पुलिस क्लब लिगमा दोस्रो जितको खोजीमा मैदान उत्रनेछन् ।

दुवै टोलीले लिगको तेस्रो चरणको खेल सकिँदा समान १ जित, बराबरी र हारको नतिजा निकाल्दै समान ४ अंक नै जोडेका छन् । त्यसैले यि दुई टोलीबीचको खेलमा रोमाञ्चक र प्रतिस्पर्धात्मक हुने अपेक्षा गरिएको छ । लिगको सुरुवाती खेलमा च्यासल युथ क्लबसँग २–० ले पराजित भएको संकटा दोस्रो खेलमा एनआरटीलाई १–० ले हराएको थियो । तेस्रो खेलमा भने संकटा जावलाखेलसँग १–१ गोलको बराबरीमा रोकिएको थियो ।

राष्ट्रिय टोलीका दुई सदस्य र केही विदेशी खेलाडीसहित सन्तुलित टोली संकटा पुलिसलाई पराजित गर्दै अंक तालिका सुधार्ने प्रयासमा हुनेछ । संकटा गतवर्ष जस्तै पुलिसलाई पराजित गर्ने लक्ष्यमा हुनेछ । संकटाले गत वर्ष पुलिसलाई २–१ ले हराएको थियो । सोही जितलाई संकटा निरन्तरता दिने लक्ष्यमा मैदानमा उत्रनेछ ।

यता, लिगमा औसतको प्रदर्शन गरिरहेको पुलिस जितको लय समात्दै गत सिजनको हारको बदला लिने दाउमा मैदानमा उत्रनेछ । पुलिस पहिलो खेलमै हिमालयन शेर्पा क्लबसँग गोलरहित बराबरीमा रोकिँदा दोस्रो खेलमा रुस्लान थ्री स्टारसँग १–० ले पराजित भयो । तेस्रो खेलमा सरस्वतीमाथि २–० को जित निकालेको थियो । राष्ट्रिय टिमका पुर्व लेफ्ट ब्याक डिफेन्डर रविन श्रेष्ठको आगमनसँगै पुलिसले राम्रो खेल पस्किरहेको छ । राष्ट्रिय टिमका तीन खेलाडी अजित भण्डारी, तेज तामाङ र रवि पासवानको साथ पाएको पुलिसले लिगमा भने सोचे अनुरुपको प्रदर्शन गर्न सकिरहेको छैन ।

आर्मी र थ्री स्टार खेल्दै

लिगको चौथौ चरणको सबैभन्दा रोमाञ्चक खेलमा आज उपाधिका दुई दावेदार विभागीय त्रिभुवन आर्मी क्लब र रुस्लान थ्री स्टारबीच प्रतिस्पर्धा हुदैछ । पक्कै पनि यि दुई टोलीबीचको खेल निकै रोमाञ्चक र प्रतिस्पर्धात्मक हुने अनुमान गरिएको छ । उपाधि दावेदारितालाई जीवन्त बनाउन यि दुई टोलीलाई स्पष्ट ३ अंकको खाँचो छ । त्यसैले दुवै टोली स्पष्ट ३ अंक जोड्ने लक्ष्यमा मैदानमा उत्रनेछ । आर्मीलाई पराजित गर्न सके चौथो स्थानमा रहेको थ्री स्टार दोस्रो स्थानमा उक्लन सक्नेछ ।

अपराजित रहेको थ्री स्टारमा गोल स्कोरिङमै समस्या छ । गोल निकाल्न सफल भए थ्री स्टारले आर्मीलाई पराजित गर्न सक्नेछ । तेस्रो चरणको खेल सकिँदा गोलरक्षक प्रिसोले लगातार क्लिनसिट राख्न सफल भएका छन् । डिफेन्समा पनि थ्री स्टार राम्रै देखिएको छ । तर, दोहोरो पहेँलो कार्डका कारण कप्तान विक्रम लामा आर्मीविरुद्धको खेलमा उपलब्ध हुने छैनन् । उनको अभाव टोलीलाई खड्कन सक्नेछ । उनको स्थानमा जीवन गुरुङले खेल्ने सम्भावना रहेको छ । अघिल्लो खेल गुमाएका उपकप्तान रुपेश केसीले टिमको कप्तानी सम्हाल्ने सम्भावना छ । थ्री स्टारको ७ अंक छ ।

उपाधि दावेदारितालाई बलियो बनाउन आर्मीलाई थ्री स्टारविरुद्धको खेलमा जित निकाल्नु आवश्यक छ । पहिलो पहिलो खेलमा फ्रेन्ड्सलाई हराएको आर्मी दोस्रो खेलमा मनाङसँग १–० ले पराजित भएको थियो । हिमालयन शेर्पालाई २–० ले पराजित गरेको थियो । प्रतिबन्धमा रहेका मिडफिल्डर सन्तोष तामाङले यही खेलबाट पूनरागमन गर्दा अर्का मिडफिल्डर दिनेश हेन्जन दोहोरो पहेँलो कार्डका गुमाउनेछन् । आर्मीका प्रशिक्षक नवीन न्यौपानले सन्तोषको आगमनसँगै टोलीको मिडफिल्ड बलियो हुने बताएका थिए ।

दुई जित र एक बराबर खेलेको तेस्रो स्थानको थ्री स्टारको ७ अंक रहेको छ । आर्मी दुई जित र एक हार ब्यहोरेको पाँचौ स्थानको आर्मीको ६ अंक रहेको छ ।