काठमाडौं (हाम्रो खेलकुद) – साविक विजेता मनाङ मस्र्याङ्दी क्लब कतार एयरवेज सहिद स्मारक ए डिभजिन लिगको चौथो चरणमा पुगेर रोकिएको छ । अघिल्ला तीन खेल जितेको मनाङ सोमबार फ्रेन्ड्स क्लबसँग १–१ को बराबरीमा रोकिएको छ । बराबरीपछि पनि मनाङको खातामा १० अंक पुगेको छ । फ्रेन्ड्सले लिगमा पहिलो अंक जोडेको छ ।

सातदोबाटोस्थित एन्फा कम्प्लेक्सको मैदानमा भएको खेलमा उत्तम राईको गोलबाट फ्रेन्ड्सले खेलमा बराबरी गरेको थियो । रुमेश बर्तौलाको क्रसमा उत्तमले डाइभिङ हेडमार्फत गोल गरेका थिए ।

पहिलो हाफमा फरवार्ड रञ्जन विष्टले गोल गरेपछि मनाङलाई अग्रता दिलाएका थिए । ११ औं मिनेटमा रञ्जनले गोल गरेका हुन् । जगजित श्रेष्ठको कर्नरमा रन्जनले सिक्स यार्ड बक्सभित्रको फ्लिक हेडर गोलमा परिणत भएको थियो ।

दुवै टोलीले केहि मौका पाएपनि सफल हुन सकेनन् । १७ औं मिनेटमा फ्रेन्ड्सका विश्व अधिकारीको प्रहार मनाङका गोलरक्षक दिप कार्कीले मुस्किलले बचाए । ३४ औं मिनेटमा फ्रेन्ड्सले पेनाल्टी अपिल गरेपनि रेफ्रीले त्यसलाई मतलब नै गरेनन् । लुइस भिडालले फेन्ड्सका फिलिपे डि सौजालाई पेनाल्टी बक्समा फाउल गरेको थिए ।

पहिलो हाफको इन्ज्युरी समयमा फ्रेन्ड्सले बराबरीको सुन्दर मौका खेर फाल्यो । प्रिजेन तामाङको प्रहार डिफेन्डरले गोललाइन नजिकबाट क्लियर गरिदिएका थिए । ४९औं मिनेटमा मनाङका फेमीको प्रहार गोलरक्षक सोजित गुरुङले सहजै बचाए । ७०औं मिनेटमा मनाङका विमल रानाको प्रहारलाई गोलरक्षक सोजित गुरुङले उत्कृष्ट बचाउ गरे । इन्ज्युरी समयको थप गरिएको दोस्रो मिनेटमा फ्लोरेन्टको फ्रिकिकमा पुजन उपरकोटीको हेडर बाहिरियो ।