एजेन्सी – म्यानचेस्टर सिटीले इंग्लिस प्रिमियर लिगमा जित निकालेको छ । सिटीले घरेलु मैदानमा सेफिल्ड युनाइटेडमाथि २–० को सहज जित निकालेको हो ।

सिटीको जितमा सर्जियो अगुइरो र केभिन डि ब्रुयनले गोल गरे । दुवै गोल दोस्रो हाफमा सम्भव भएको थियो । घरेलु टोलीले सेफिल्डलाई दवावमा राखेपनि सिटीले गोलको लागि दोस्रो हाफ नै कुर्नुपरेको थियो ।

खेलको १७औं मिनेटमा सिटीका रियाद महारेजको प्रहार सेफिल्डको डिफेन्डरले ब्लक गरिदिएका थिए । २५औं मिनेटमा सेफिल्डका कलुम रोविन्सन र मोउसेटको सेट पिसमा मोउसेटको प्रहार फर्नाडिन्होले ब्लक गरिदिएका थिए । लगत्तै ओलिभर नुरवुडको प्रहार क्रसबारबाट बाहिरिदा सेफिल्ड अग्रता लिनबाच चुकेको थियो ।

२९औं मिनेटमा लेस मोउसेटलले गोल गर्दै सेफिल्डलाई अग्रता दिलाएपनि उनको गोलले भिएआरबाट मान्यता पाएन । पहिलो हाफमा केही दवाव झेलेपनि सिटीले दोस्रो हाफमा उत्कृष्ट प्रदर्शनसहित दुई गोल गर्न सफल भयो । ५२औं मिनेटमा केभिन डि ब्रुयनको पासमा सर्जियो अगुइरोको गोलसँगै सिटी खेलमा अघि बढेको थियो ।

७०औं मिनेटमा सिटीले पेनाल्टी अपिल गरेपनि रेफ्रीलाई त्यसलाई इन्कार गरिदिए । ७५औं मिनेटमा ब्रुयनको प्रहार आकासियो । ७८औं मिनेटमा सेफिल्डका मोउसेटले बराबरीको सुन्दर मौका खेर फाल्यो । ८२औं मिनेटमा ब्रुयनले रियाद महारेजको पासमा गोल गर्दै सिटीलाई २–० को जित दिलाए ।

जितसँगै तेस्रो स्थानमा रहेको सिटीले २० खेलबाट ४१ अंक जोडेको छ । सिटी शीर्षस्थानको लिभरपुलभन्दा १४ अंकले तथा दोस्रो स्थानको लेस्टर सिटीसँग १ अंकले पछि छ । एक खेल कम खेलेको लिभरपुलको १९ खेलबाट ५५ अंक छ । २० खेलबाट लेस्टरको ४२ अंक रहेको छ । सेफिल्ड २९ अंक जोडेर आठौं स्थानमा यथावत छ ।