काठमाडौं (हाम्रो खेलकुद) – कतार एयरवेज सहिद स्मारक ए डिभिजन लिगअन्तर्गत शुक्रबार नेपाल पुलिस क्लब र सरस्वती युथ क्लबबीचको पहिलो हाफ गोलरहित बराबरीमा टुंगिएको छ । पुलिस पहिलो हाफको इन्ज्युरी समयमा १० खेलाडीमा सिमिति भएको छ । अन्जन राई दाहोरो पहेलो कार्डपछि रातो कार्ड पाउँदै मैदान बाहिरिएपछि पुलिस १० खेलाडीमा सिमित भएको हो । 

दशरथ रंगशालामा दुवै टोलीले गोलको थोरै अवसर पाए । तर, सदुपयोग गर्न सकेनन् । खेलको पाँचौ मिनेटमा लामो समयपछि फुटबलमा पुनरागमन गरेको पुलिसका रविन श्रेष्ठको क्रसमा रवि पासवानले बल भेटेपनि नियन्त्रणमा लिन सकेनन् ।

२२औं मिनेटमा रविको क्रसमा सौजन राईले गोल गर्ने सुन्दर मौका खेर फाले । अनमार्क रहेका उनले पर्याप्त समय लिएर गरेको प्रहार पोष्टबाट थोरै बाहिरियो ।३२औं मिनेटमा रविको प्रहार सरस्वतीका गोलकिपर प्रदीप भण्डारीले उत्कृष्ट पञ्च गर्दै बचाए ।

३५औं मिनेटमा सरस्वतीका कप्तान राजकुमार घिसिङको फ्रिकिक प्रहार क्रसबारमा लागेर फर्कदा सरस्वतीले अग्रता लिने सुवर्ण अवसर खेर फाल्यो । यसअघिका दुई चरणका खेलमा पुलिस र सरस्वतीले जित निकाल्न सकेका छैनन् ।

पुलिसले २ मध्ये १ मा बराबर र अर्कोमा हार बेहोरेको थियो । सरस्वतीले भने दुवै खेल गुमाएको थियो । आजै सातदोबाटोस्थित एन्फा कम्प्लेक्समा भएको खेलमा त्रिभुवन आर्मी क्लबले यति हिमालयन शेर्पालाई २–० ले हराएको थियो ।