एजेन्सी – लन्डन क्लब चेल्सी इंग्लिस प्रिमियर लिग फुटबलमा साउथह्याम्पटनसँग स्तब्ध बनेको छ । चेल्सी घरेलु मैदानमै साउथह्याम्टनसँग २–० ले स्तब्ध बनेको हो ।

यससँगै चेल्सी प्रिमियर लिगमा घरेलु मैदानमा पछिल्लो ४ मध्ये ३ खेलमा पराजित भएको छ । घरेलु मैदानमा चेल्सी वेस्टह्यामसँग १–० र बर्नमाउथसँगपनि १–० ले नै पराजित भएको थियो । एस्टन भिल्लामाथि २–१ को जित निकाल्न सफल भएको थियो ।

स्टामफोर्ड ब्रिजमा चेल्सीलाई स्तब्ध बनाउन मिचेल ओवाफेमी र नाथन रेडमन्डले गोल गरे । पहिलो र दोस्रो हाफमा समान १–१ गोल सम्भव भएको थियो । साउथह्याम्टनलाई दवावमा राखेपनि चेल्सीले साउथह्याम्पटनको बलियो रक्षापङ्तिलाई तोड्न नसक्दा स्तब्ध हुन पुग्यो ।

३१औं मिनेटमा मिचेल ओवाफेमीले पिएरे इमाइल होब्जजर्जको पासमा गोल गर्दै पाहुना टोलीलाई अग्रता दिलाए । ७३औं मिनेटमा नाथनले गोल गर्दै चेल्सीलाई २–० ले स्तब्ध पारे । हारपछि चेल्सी ३२ अंकसहित चौथो स्थानमा यथावत रहँदा साउथह्याम्टन २१ अंक जोडेर १४औं स्थानमा उक्लिएको छ ।

अपराजित रहेको लिभरपुलले १८ खेलबाट ५२ अंक जोड्लै शीर्षस्थानमा बलियो पकड बनाएको छ । जुन दोस्रो स्थानको लेस्टर सिटीको भन्दा १३ अंकले बढी हो । लेस्टरको १९ खेलबाट ३९ अंक छ । सिटीको १८ खेलबाटै ३८ अंक छ ।

प्रिमियर लिगकै अर्काे खेलमा सेफिल्ड युनाइटेड र वाटफोर्डले १–१ गोलको बराबरी खेल्दै अंक बाँडेको छ । सेफिल्ड २९ अंकसहित छैटौ स्थानमा रहँदा वाटफेर्ड रेलिगेसन जोनको १९औं स्थानमा रहेको छ ।