काठमाडौं (हाम्रो खेलकुद)– दश खेलाडीमा समिति हुँदै खेलको अन्त्य गरेको मनाङ मस्र्याङ्दी क्लबले कतार एयरवेज सहिद स्मारक ए डिभिजन लिगमा लगातार तेस्रो जित दर्ता गरेको छ । ब्रिगेड ब्वाइज क्लब (बिबिसी) लाई बिहीबार १–० ले हराउँदै साविक विजेता समेत रहेको मनाङले ३ खेलमा शतप्रतिशत नतिजा निकालेको छ ।

९ अंकसहित मनाङ शीर्षस्थानमा फर्केको छ । बुधबार मछिन्द्र क्लबले गोलअन्तरमा पछि पारेपछि मनाङ दोस्रो स्थानमा झरेको थियो । एन्फा कम्प्लेक्स सातदोबाटोमा भएको खेलमा जगजित श्रेष्ठले पहिलो हाफमा गरेको गोल मनाङको जितका लागि पर्याप्त रह्यो ।

खेलको २५ औं मिनेटमा जगतिजले वान टचमा गोल गरेका थिए । मपनेटमा भिडाल लुइसको प्रहार डिफ्लेक्ट भएपनि जगजितले वान टचमा गोल गरेका थिए । राष्ट्रिय टोलीका पूर्व सदस्य जगजित लिगकै लागि अष्ट्रेलियाबाट स्वदेश फर्केका हुन् । अष्ट्रेलिया रहँदा पनि फुटबलमा सक्रिय रहेका जगजित राष्ट्रिय टोली बन्द प्रशिक्षमा सामेल भएपछि अन्तिम छनोटमा भने पर्न असफल रहँदै आएका छन् ।

बिबिसीले पनि खेलको सुरुमै अग्रताको मौका पाएको थियो , तर सफल हुन सकेन । खेलको तेस्रो मिनेटमा बिबिसीका कप्तान अनिल गुरुङको प्रहार पोस्ट नजिकबाट बाहिरियो । मनाङले पनि केहि अवसर खेर फाल्यो । २३औं मिनेटमा मनाङका विमल रानाले वान टु वानमा गोल गर्नबाट चुके । २५औं मिनेटमा विमलको अर्को प्रहार गोलकिपरले सहजै बचाए ।

५२औं मिनेटमा बिबिसीका जया गुरुङको प्रहार गोलरक्षक दिप कार्कीले बचाए । ५५औं मिनेटमा मनाङका फेमीको प्रहार गोलकिपर विशाल सुनारले बचाए । ६६औं मिनेटमा विमल वान भर्सेस वानमा गोल गर्न चुके । उनको चिप प्रहार गोलरक्षक विशालले डाईभ उत्कृष्ट बचाउ गरे ।

७२ औं मिनेटमा रन्जन बिष्टको पासमा विमलले बल भेट्न सकेनन् । ७३ औं मिनेटमा एकराज बुढाथोकी सिधै रातो कार्ड खादै मैदानबाट बाहिरिएपछि मनाङ १० खेलाडीमा समेटियो । विजय गुरुङलाई गम्भीर ट्याकल गरेपछि रेफ्री कविन व्यन्जनकारले एकराजलाई सिधै रातो कार्ड देखाएका थिए ।

अघिल्लो वर्ष लिग जित्दाका अधिकांश खेलाडीले क्लब छाडेपनि मनाङले आफ्नो पुरानो छविलाई निरन्तरता दिदै लगातार तेस्रो जित निकाल्न सफल भएको छ । मनाङले यसअघि भएको पहिलो खेलमा एपीएफलाई २–० तथा आर्मीलाई १–० गोल अन्तरले पराजित गरेको थियो । बिबिसीले ३ मध्ये १ खेलमा जित र बाँकी २ खेलमा हार बेहोरेको छ । दशरथ रंगशालामा आज हुने लिगको खेलमा संकटा र प्रभु जावलाखेल युथ क्लबबीच प्रतिस्पर्धा हुनेछ ।