काठमाडौं (हाम्रो खेलकुद)– च्यासल युथ क्लबका कप्तान सन्तोष साहुखलले लिगमा एक सयौं गोल पुरा गर्न अर्को खेल कुर्नुपर्ने भएको छ । सन्तोषले सयौ गोल पुरा गर्ने अपेक्षा गरिएको कतार एयरवेज सहिद स्मारक ए डिभिजन लिगमा बुधबार उनको टोली च्यासल दस खेलाडीमा सिमित न्यूरोड टिम (एनआरटी) सँग २–१ ले पराजित भएको छ । ९६ गोलबाट यसपटकको लिग सुरु गरेका सन्तोषले संकटाविरुद्ध २ र मछिन्द्रविरुद्ध १ गोल गर्दै ९९ गोल पुर्याएका थिए ।

दशरथ रंगशालामा एनआरटीलाई जित दिलाउन जुनियर अनगुइने निकेङ र दर्शक गुरुङले गोल गरेका थिए । २३औं मिनेटमा जुनियर अनगुइने निकेङले गोल गर्दै एनआरटीलाई अग्रता दिलाएका थिए । कर्नरमा प्राप्त बललाई जुनियरले हेडमार्फत गोल गर्न सफल भए । त्यसअघि प्रकाश बुढाथोकीको फ्रिकिकलाई च्यासलका गोलकिपर एलेन न्यौपानेले पन्च गरेपछि त्यसमा एनआरटीले कर्नर पाएको थियो । त्यहि कर्नरबाट आएको बलमा जुनियरले हेड गोल गरेका हुन् ।

खेल सकिन ४ मिनेट बाँकी रहँदा दर्शनले एकल प्रयासमा गोल गरेका थिए । काउन्टर एट्याकमा मध्यभाग भन्दा पनि पछाडिबाट बल अघि बढाएका दर्शनले पेनाल्टी बक्स भित्रबाट गोल गरेका थिए । त्यसअघि ७१ औं मिनेटमा जोेर्डन जुनियर एन्डेम्बा ओओनाले दोहोरो पहेलो कार्ड पाएपछि एनआरटी १० खेलाडीमा सिमित भएको थियो । इन्जुरी समयमा अमिर श्रेष्ठले च्यासलका लागि गोल गरेपनि च्यासलको हार टरेन ।

तेस्रो मिनेटमा च्यासलका अमिर श्रेष्ठको बक्स बाहिरको सशक्त प्रहार क्रस बारमा लागेर फर्कदा च्यासल अग्रता लिनबाट चुक्यो । १२ औं मिनेटमा हायातो वाकिनोको क्रसमा सन्तोष साहुखलको हेडरले पोष्टको दिशा लिन सकेन । १७औं एनआरटीका कप्तान प्रकाश बुढाथोकीको प्रहार आकासियो । लगत्तै प्रकाशको अर्को प्रहार आकासियो । १९औं प्रकाशको प्रहार च्यासलका गोलरक्षक एलेन न्यौपानेले सहजै बचाए ।
एनआरटीले यसअघिका २ खेलमा १ जित र १ हार बेहोरेको थियो ।

एनआरटीको ४ अंक पुगेको छ । गत सिजन अंकतालिको पुछारमा रहेको एनआरटीको यो सिजन २ अंक घटाइएको छ । सरस्वती युथ क्लबलाई ४–० ले हराएको एनआरटी संकटा क्लबसँग १–० ले पराजित भएको थियो । च्यासल पहिलो खेलमा संकटालाई २–० ले हराएको थियो भने अर्को खेलमा मछिन्द्र क्लबसँग १–१ को बराबरीमा रोकिएको थियो ।