एजेन्सी – पछिल्लो समय युभेन्टसको प्रदर्शन खस्किएसँगै क्लबले जनवरी ट्रान्सफर विन्डोमा नयाँ खेलाडी अनुबन्धका लागि गृहकार्य सुरु गरेको छ  विशेषगरी आक्रमणमा टोलीले सुधार गर्ने लक्ष्य राखेको छ ।

क्रिस्टियानो रोनाल्डोको आगमनसँगै क्लबले आक्रमणमा सुधार पाएको थियो । तर रोनाल्डोको उमेर बढ्दै गएसँगै उनीबाट नियमित रुपमा उत्कृष्ट प्रदर्शन हुन सकेको छैन । रोनाल्डो आफैंले पनि केहि विश्राम लिंदै क्लबका लागि खेल्दै आएका छन् । क्लबले अब रोनाल्डोलाई साथ पुग्ने हिसाबले नयाँ खेलाडी अनुबन्ध गर्ने तयारी गरेको छ ।

नर्वेका युवा खेलाडी एर्लिङ हालान्डलाई युभेन्टसले आफ्नो मुख्य खेलाडीको रुपमा हेरेको छ । रेड बुल साल्जबर्गका लागि खेल्दै आएका उनले च्याम्पियन्स लिगमा लगातार गोल गर्दै चर्चा बटुलेका छन् । इटालियन संचार माध्यामका अनुसार युभेन्टसले अन्य ठूला क्लबलाई पछि पार्दै उनीसँग मौखिक सम्झौता गरिसकेको छ ।

हालान्डले मात्र १९ वर्षको उमेरमा यस सिजन २२ खेल खेल्दै २८ गोल गरेका छन् । उनले च्याम्पियन्स लिगका ६ खेलमा ८ गोल गर्दै शीर्ष स्तरको फुटबलमा पनि आफूलाई प्रमाणित गरेका छन् । युवा अवस्थामा भएका कारण उनले युभेन्टसको आक्रमणमा दिर्घकालिन भूमिका खेल्न सक्ने छन् ।

हालान्डका एजेन्ट मिनो रायोला र युभेन्टसको सम्बन्ध राम्रो छ । उनकै सहयोगमा डच डिफेन्डर माथिस डे लिग्ट इटालियन क्लब आएका थिए ।