काठमाडौँ प्रथम ललित स्मृति यु १८ फुटबल प्रतियोगिताको उपाधि त्रिभुवन आर्मी क्लबले जितेको छ । जगदम्बा लुम्बिनी फुटबल क्लबलाई बुधबार ट्राइबेकरमा ३–१ ले हराउँदै आर्मीले उपाधि जितेको हो । त्यो जितसँगै समूह चरणमा लुम्बिनीसँगको हारको बदला लिन आर्मी सफल भएको थियो । त्यो बेला लुम्बिनीले आर्मीलाई ६–० ले हराएको थियो ।

ललित स्मृति यु-१८ उपाधिका साथ आर्मीका खेलाडी ।

सातदोबाटोस्थित एन्फा कम्प्लेक्सको एस्ट्रो टर्फमा निर्धारित समय १–१ गोलको बराबरीमा सकिएको थियो । त्यसपछि निर्णयका लागि सिधै पेनाल्टी सुट आउटमा लगिएको थियो ।
लुम्बिनीका मन्दिप थापा, तेजेन्द्र पुनको पेनाल्टीलाई रोक्दै आर्मीका गोलकिपर अर्पण कार्कीीले टोलीको जितको आधार तयार पारेका थिए । त्यस्तै लुम्बिनीका कप्तान जनम मान लिगलको प्रहार बाहिरिएको थियो भने रञ्जित थापा मात्र गोल गर्न सफल भए ।
आर्मीका कप्तान अविशेक रिजाल, प्रिजन तामाङ र दोर्जे तामाङले गोल गरेका थिए । दिनेश हेन्जान र अनोस मगर गोल गर्न असफल रहे ।
लुम्बिनीले खेलमा लिएको अग्रता जोगाउन नसक्दा पहिलो संस्करणको उपाधि जित्ने मौका गुमाएको थियो । कप्तान जनममानले छैटौं मिनेटमा गोल गर्दै लुम्बिनीलाई अघि बढाएका थियो । खेल सकिन १५ मिनेट बाँकी रहँदा पेनाल्टी गोलमार्फत आर्मीले खेलमा बराबरी गरेको थियो । लुम्बिनीका खेलाडीले पेनाल्टीमा विपक्षी खेलाडीलाई फाउल हानेपछि आर्मीले पेनाल्टी पाएको थियो । प्रिजनले पेनाल्टीमा गोल गर्दै खेललाई बराबरीमा लगेका थिए ।
लुम्बिनीका प्रशिक्षक याम गुरुङले हारको दोष रेफ्रीलाई लगाएका छन् । उनले रेफ्रीले अनावश्यक पेनाल्टी दिएको बताए ।
समूह चरणको नतिजाले टोली दबाबमा रहेको स्वीकार्दै आर्मीका प्रशिक्षक चक्र तामाङले भने, ‘दबाबको असर पहिलो हाफमा देखियो । दोस्रो हाफको बराबरी गोलपछि हामी खेलमा फर्केका थियौं ।’

पेनाल्टीका क्रममा आर्मी (निलो) र लुम्बिनीका खेलाडी ।

उपाधिसंगै आर्मीले ट्रफी तथा नगद ३ लाख रुपैयाँ प्राप्त गर्यो । लुम्बिनीले एक लाख ५० हजार रुपैया पायो । संकटाका सुशील बस्नेत उत्कृष्ट गोलकिपर, सोही टोलीका दामोदर थापा उत्कृष्ट मिडफिल्डर घोषित भए । आर्मीका तामाङ उत्कृष्ट प्रशिक्षक चुनिए । उत्कृष्टसबैले समान १५ हजार रुपैयाँ पाए ।
आर्मी र लुम्बिनीका खेलाडीलाई राष्ट्रिय खेलकुद परिषद्का सदस्यसचिब केशब कुमार बिष्ट, एन्फाका कार्यबाहक अध्यक्ष नरेन्द्र श्रेष्ठ,उपाध्यक्षा कर्मा छिरिङ शेर्पालगायत पदाधिकारीले पुरस्कृत गरे । जेठ १९ गते पूर्नबहाली भएपनि शेर्पा पहिलो पटक एन्फाको औपचारिक कार्यक्रममा सहभागी भएका थिए ।

उत्कृष्ट प्रशिक्षक चुनिएका आर्मीका चक्र तामाङ

अखिल नेपाल फुटबल संघ (एन्फा) ले आफ्ना कार्यबहाक अध्यक्ष स्वर्गिय ललितकृष्ण श्रेष्ठको स्मृतिमा डिभिजन क्लब र अन्य क्लबबीच यु –१८ फुटबल प्रतियोगिता आयोजना गरेको थियो । श्रेष्ठको गत बर्ष जेठ २९ गते करेन्ट लागेर मृत्यु भएको थियो । एन्फाले उनको स्मृतिमा यसपटक जेठ २९ गते नै प्रतियोगिता सुरु गरेको थियो । ए डिभिजनका ८ र राष्ट्रिय लिग खेलेका मोसफलका ४ टोलीगरि १२ टोलीले प्रतिस्पर्धामा भाग लिएका थिए ।