एजेन्सी – इटालियन च्याम्पियन युभेन्ट्सले फ्रान्स तथा आफ्ना पुर्व मिडफिल्डर इंग्लिस क्लब म्यानचेस्टर युनाइटेडका पाउल पोग्बालाई क्लबमा भित्र्याउने तयारी थालेको छ ।

यसका लागि युभेन्ट्सले पोग्बालाई टुरिनमा पुनः फर्काउन युनाईटेडसँग छलफल अघि बढाउने र पोग्बाका लागि ५२ मिलियन युरोसहित ईम्री क्यानलाई युनाइटेड पठाउन सकिने प्रस्ताव अघि सारेको छ ।

इटालियन पत्रिका टुट्टोका अनुसार पोग्बा ओल्ड ट्राफोर्ड छाड्न तयार रहेको र सिरी ए मा फर्कने विषयमा सकारात्मक छन् । सोही कारण युभेन्ट्स आगामी जनवरी विन्डोलाई पोग्बालाई क्लबमा फर्काउन चाहेको छ । पोग्वालाई स्पेनिस महारथी रियल मड्रिडले पनि चासो देखाइरहेको छ ।

पोग्बा चोट मुक्त हुँदै गत आइतबार युनाइटेडको खेलमा फर्किएका थिए । चोटका कारण करिब तीन महिना मैदान बाहिर रहेका पोग्वा दोस्रो हाफमा जेसे लिङ्गार्डको स्थानमा मैदान प्रवेश गर्दै खेलमा पूनरागमन गरेपनि युनाइटेड पुछारको टिम वाटफोर्डसंग २–० ले पराजित भएको थियो ।

फ्रान्सका मिडफिल्डरको युनाईटेडसँगको सम्झौता १८ महिनापछि सकिदैछ । सोही कारण नयाँ सम्झौता वा पोग्बा बेच्नुपर्ने दबाब युनाइटेडलाई रहेको छ । पोग्बा २०१६ मा यभेन्ट्सबाटै युनाइटेडमा कीर्तिमानी ९० मिलियन पाउन्डमा प्रिमियर लिग फर्किएका थिए ।

उनले इटालीमा रहँदा सिरी ‘ए’ का साथै दुई पटक कोपा इटालियाको उपाधि जित्न सफल भएका थियो । युनाइटेडमा रहंदा पोग्बाले युरोपा लिग र लिग कपको उपाधि जितेका छन् । उनले गत सिजन नै क्लब छाड्न चाहेपनि क्लबले उनको आग्रह अस्विकार गरको थियो ।