काठमाडौं (हाम्रो खेलकुद)– रुस्लान थ्री स्टार क्लबले कतार एयरवेज सहिद स्मारक ए डिभिजन लिगमा पहिलो जित दर्ता गराएको छ । नेपाल पुलिस क्लबलाई १–० ले हराउँदै थ्री स्टारले दोस्रो खेलमा पहिलो जित दर्ता गराएको हो ।

खेल सकिन ६ मिनेट बाँकी रहँदा सुशिल राईले गरेको गोल निर्णायक बन्दा थ्री स्टार विजयी भएको थियो । सुसान राईले मैदानको दायाँबाट गरेको क्रसमा सुशिले सिक्स यार्ड बक्स बाहिरबाट गोल गरेका हुन् । दोस्रो खेलमा आइपुग्दा थ्री स्टारको यो पहिलो गोल हो ।

पहिलो हाफमा दुवै टोलीले खासै आक्रमण बुन्न सकेका थिएनन् । ४६औं मिनेटमा थ्री स्टारका हम्जातको प्रहार गोलकिपरले पञ्च गरे । त्यसकै रिवाउन्डमा सुसानको प्रहार अजितले ब्लक गरिदिए । ४९औं मिनेटमा मिक्छेन तामाङको प्रहार आकासियो । ५३औं मिनेटमा पुलिसका सुमन लामाको प्रहार पोष्टमाथिबाट गयो ।

५४औं मिनेटमा थ्री स्टारका मिक्छेनको कर्नरमा कप्तान विक्रम लामाको हेडर पोष्टबाट थोरै बाहिरियो । लगत्तै पुलिसका सुमन लामाले वान भर्सेस वानमा गोल गर्न सकेनन् । उनको प्रहार थ्री स्टारका गोलरक्षक प्रिसोले बचाए । ६८औं मिनेटमा हम्जातको क्रसमा विजय भुजेलको हेडर पोष्टबाट थोरै बाहिरिदा थ्री स्टार अग्रता लिनबाट चुक्यो ।

पूर्व विजेता यी दुई टोली थ्री स्टार र पुलिसले आ आफ्नो पहिलो खेलमा गोलरहित बराबरी खेलेका थिए । पुलिसले यति हिमालयन शेर्पासँग गोलरहित बराबरी खेलेको थियो । त्यस्तै थ्री स्टारले प्रभु बैंक जाउलाखेलसँग गोलरहित बराबरी खेलेको थियो ।

त्यसअघि दशरथ रंगशालामै भएको पहिलो खेलमा सिग्नेचर मनाङ मस्र्याङ्दी क्लबले त्रिभुवन आर्मी क्लबलाई १–० ले हराउँदै लगातार दोस्रो जित हासिल गरेको थियो । ६ अंकका साथ मनाङ शीर्षस्थानमा छ । थ्री स्टार ४ अंकसहित दोस्रो स्थानमा उक्लेको छ । समान ४ अंक भएका च्यासल तेस्रो र जाउलाखेल युथ क्लब चौथो स्थानमा छन् ।