काठमाडौं (हाम्रो खेलकुद)– यति हिमालयन शेर्पाले कतार एयरवेज सहिद स्मारक ए डिभिजन लिगको आफ्नो दोस्रो खेलमा पनि बराबरी खेलेको छ । लिगमा आइतबार भएको एकमात्र खेलमा शर्पा र विभागिय टोली नेपाल एपिएप क्लबले १–१ को बराबरी खेलेका हुन् ।

एपिएफले लिगमा पहिलो अंक जोड्दा शेर्पाको २ अंक पुगेको छ । एपिएफ पहिलो खेलमा मनाङ मस्र्याङ्दी क्लबसँग २–० ले पराजित भएको थियो । शेर्पाले पहिलो खेलमा अर्को विभागिय टोलीसँग गोलरहित बराबरी खेलेको थियो ।

दशरथ रंगशालामा भएको खेलमा दुवै गोल दोस्रो हाफमा सम्भव भएको थियो । दोस्रो हाफ सुरु भएको दोस्रो मिनेटमा त्रिदेव गुरुङको गोलबाट शेर्पाले अग्रता लिएको थियो । तर त्यो अग्रता लामो समय टिकेन ।

५८ औं मिनेटमा एपिएफका प्रविण स्याङ्तानले बराबरी गोल फर्काएका थिए । आशिष लामाले रक्षक आशिष गुरुङलाई छलाउँदै दिएको क्रसमा प्रविणले क्लोज रेन्जबाट गोल गरेका थिए ।

सातौं मिनेटमा नै एपिएफले गोल गर्न असवर पाएको थियो । प्रविणले गरेको प्रहारलाई शेर्पाका गोलकिपर किशोर गिरीले रोके । लगत्तै अर्को प्रहार पनि किशोरले विफल पारे । १४ औं मिनेटमा शेर्पाले गोल गर्ने मौका पाएपनि सफल भएन ।

स्टेफेनको प्रहार पोष्टमाथिबाट बाहिरिएको थियो । ३७ औं मिनेटमा अलरिच सिवेको प्रहारले पोष्टको दिशा लिन सकेन । पहिलो हाफका लागि एक मिनेट बाँकी रहँदा एपिएफका सुदीप सिख्राकारको फ्रिकिक पोष्ट नजिकबाट बाहिरियो । ८१औं मिनेटमा एपिएफले अग्रता लिने मौका खेल फाल्यो । प्रदीप लामाको पासमा क्लोज रेन्जबाट प्रविणको प्रहार आकासिएयो ।