एजेन्सी – क्याटलान क्लब बार्सिलोना स्पेनिस ला लिगा अन्तर्गत शनिबारको खेलमा अलाभेसलाई पराजित गर्दै शीर्षस्थानमा उक्लिएको छ । घरेलु मैदानमा बार्सिलोनाले ४-१ को सहज जित दर्ता गरेको हो ।

खेलको १४ औं मिनेटमा बार्सिलोनाले एन्टोइन ग्रिज्मनको गोलमा अग्रता लिएको थियो । उनले लुइस सुआरेजको पासमा पेनाल्टी क्षेत्रको भित्रबाट गरेको प्रहार गोलमा परिणत भएको थियो । २७ औं मिनेटमा आलाभेसका वकासोले मुबारकले गरेको प्रहारले पोस्टको दिशा लिन सकेन ।

खेलको ३८ औं मिनेटमा लिओनेल मेस्सीले पेनाल्टी क्षेत्रको ६ यार्ड बक्सबाट गरेको प्रहार पोस्टभन्दा थोरै परबाट बाहिरियो । लगत्तै मेस्सीकै प्रहारलाई डिफेन्डरले ब्लक गरे । ४४ औं मिनेटमा आर्टुरो भिडालको गोलमा बार्सिलोनाले अग्रता दोब्बर पार्यो । उनले सुआरेजकै पासमा पोस्टको तल्लो भागमा गरेको प्रहार गोलरक्षकले बचाउन सकेनन् ।

दोस्रो हाफको सुरुवातदेखि नै बार्सिलोनाले खेलमा थप आक्रमण बुन्यो । सुरुवाती दुई आक्रमण अफसाइड भएपछि बार्सिलोना ५५ औं मिनेटमा भने पछाडी पर्यो । पेरे पोन्सले रुबेन डुआर्टेको क्रसलाई हेडरमार्फत गोलमा परिणत गर्दै पाहुना टोलीलाई खेलमा फर्काउने प्रयास गरे । त्यसपछि केहिबेर अलाभेसले लगातार आक्रमण बुनेपनि अर्को गोल फर्काउन भने सकेन ।

कप्तान लिओनेल मेस्सीले ६८ औं मिनेटमा गोल गर्दै बार्सिलोनाको दुई गोलको अग्रता पुन: स्थापना गरे । उनले पनि सुआरेजकै पासमा पेनाल्टी क्षेत्र बाहिरबाट उत्कृष्ट गोल गरेका थिए । लगत्तै सुआरेजको हेडरलाई विपक्षी गोलरक्षकले विफल पारे ।

खेलको ७१ औं मिनेटमा बार्सिलोनाले पेनाल्टी पायो । मार्टिन अगुएरगबिरियाले पेनाल्टी क्षेत्रभित्र ह्याण्ड गरेपछि रेफ्रीले भिडियो असिस्टेन्ट रेफ्रीको सहायता लिँदै पेनाल्टी दिए । प्राप्त पेनाल्टीलाई सुआरेजले गोलमा परिणत गर्दै बार्सिलोनाको अग्रता फराकिलो पारे ।

यस जितसँगै बार्सिलोनाले १८ खेलमा ३९ अंक जोडेको छ । दोस्रो स्थानको रियलले एक खेल कम खेल्दै ३६ अंक बनाएको छ । रियलले सोमबार हुने खेलमा एथ्लेटिक बिल्बाओको सामना गर्नेछ ।

आज भएको अन्य खेलमा एइबारले ग्रानडामाथि ३-० को सहज जित दर्ता गर्यो । सेभिल्लाले मालोर्काको मैदानमा २-० को जित दर्ता गर्दै तेस्रो स्थानमा पकड बलियो बनायो । सेभिल्लाको १८ खेलमा ३४ अंक रहेको छ ।