काठमाडौं (हाम्रो खेलकुद) – प्रभु जावलाखेल युवा क्लबले कतार एअरवेज सहिद स्मारक ए डिभिजन लिग २०७६ मा पहिलो जित दर्ता गरेको छ ।

शनिबार सातदोबाटोस्थित एन्फा कम्प्लेक्समा भएको खेलमा जावलाखेलले सरस्वती युवा क्लबलाई १-० ले पराजित गर्यो । खेलको दशौं मिनेटमा ड्याडी जुनियर वाम्वाले गरेको गाेलनै जावलाखेलको जितमा निर्णायक बन्यो । विदेशी सहकर्मी फाेडे फाेफानाले दुई डिफेन्डरलाई बिट गर्दै दिएकाे पासमा वाम्बाको पहिलाे प्रयास असफल भएपनि दाेस्राे प्रयासमा उनले लड्दै गाेल गर्न सफल भएका थिए ।

त्यसअघि पाँचाै मिनेटमा जावलाखेलले गाेलकाे सुन्दर माैका खेर फालेकाे थियाे । १६औं मिनेटमा जावलाखेलका विजय घलानकाे प्रहार पाेष्टबाट बाहिरियाे । ५५ औं मिनेटमा अरुज सिंहकाे प्रहार बाहिरिदा जावलाखेलले अग्रता बढाउन सकेन ।

त्यसको दुई मिनेटपछि नै विजयको प्रहार क्रसबारमा लाग्दै फर्किएपछि रिबाउन्ड बलमा ड्याडीकाे हेडर गाेलरक्षक प्रदीप भण्डारीले सहजै बचाईदिए । ६५ औं मिनेटमा सरस्वतीका कृष्ण रानाभाटकाे प्रहार बाहिरिदा बराबरीबाट चुक्याे ।

यस जितसँगै पहिलो खेलमा रुस्लान थ्री स्टारलाई बराबरीमा रोकेको जावलाखेल लिगको शीर्षस्थानमा रहेको च्यासलसँग अंक बराबरी गर्न सफल भएको छ । जावलाखेल र च्यासलको समान ४-४ अंक छ । अंकविहिन सरस्वती भने लगातार दोस्रो हारसँगै अंक तालिकाको पुछारमा छ ।