काठमाडौं (हाम्रो खेलकुद) – कतार एयरवेज सहिद स्मारक ए डिभिजन लिगको दोस्रो चरणको पहिलो खेलमा च्यासल युवा क्लब र सानमिगल मछिन्द्र क्लबको खेल १-१ को बराबरीमा टुंगिएको छ।

सातदोबाटोस्थित एन्फा कम्प्लेक्समा भएको खेलकाे तेस्राे मिनेटमा च्यासलका गाेलरक्षक एलेन न्याैपाने बिट भइसकेकाे अवस्थामा दिपक राईकाे फितलाे प्रहार डिफेन्डर नरेन्द्र चाैधरीले क्लियर गरिदिए । आठाैं मिनेटमा मछिन्द्रका अभिषेक रिजालकाे क्रसलाई एडिलाजा साेमिडेले हेडिङ गर्ने प्रयास गरेपनि भेट्न सकेनन् ।

१०अाैं मिनेटमा साेमिडेकाे प्रहार पाेस्टबाट थाेरै बाहिरयाे ।२४अाैं मिनेटमा च्यासलका सुनिल बलकाे प्रहार आकासियाे ।
२८अाैं मिनेटमा कप्तान सन्ताेष साहुखलकाे उत्कृष्ट गाेलमा च्यासलले खेलमा अग्रता लिएकाे थियाे । सन्ताेषले तीन डिफेन्डर वरपर रहेको अवस्थामा टर्नमा गरेको सशक्त प्रहार गाेलरक्षक विशाल श्रेष्ठले राेक्ने कुनै माैका पाएनन् ।

३०अाैं मिनेटमा मछिन्द्रले बराबरीकाे सुन्दर माैका खेर फाल्याे । दिपक राईकाे प्रहार गाेलरक्षक एलनले पञ्च गरेर बचाईदिए । लगत्तै साेमिडेकाे प्रहारले पाेस्टकाे दिशा लिन सकेन । ३५अाैं मिनेटमा रन्जित धिमालकाे फ्रिकिक क्रसबारबाट बाहिरिँदा मछिन्द्र बराबरीबाट चुकेकाे थियाे ।

दोस्रो हाफमा मछिन्द्रले दवाव कायम गरेपनि सुरुवाती समयमा पोस्ट आक्रमण गर्न सकेन । ५१अाैं मिनेटमा अभिषेक रिजालले गाेल गरेपनि रेफ्रीले अफसाइडकाे इसारा गरिदिए । ५४अाैं मिनेटमा अभिषेककाे हेडर सदुपयाेग हुन सकेन । ७९अाैं मिनेटमा एन्द्रियस नियाकाे क्रसमा साेमिडेकाे हेडर सदुपयाेग हुन सकेन ।

निर्धारित समयको २ मिनेट समय बाँकी रहँदा मछिन्द्रले बराबरी गोल फर्कायो ‌। विशाल राईको पासमा देवेन्द्र तामाङले पेनाल्टी क्षेत्रभित्र अनमार्क हुँदा गरेको प्रहार गोलमा परिणत भएको थियो । इन्ज्युरी समयको अन्तिम मिनेटमा गोलरक्षक विशाल श्रेष्ठले टाइगा नाकामुराको फ्रिकिकलाई उत्कृष्ट बचाउ गर्दै खेल बराबरीमा राखे ।

यससँगै दुवै टोलीले १-१ अंक बाँडेका छन् । दुवै टोलीले पहिलो खेलमा जित दर्ता गरेका थिए । मछिन्द्रको ३ अंक र च्यासलको ४ अंक भएको छ ।