एजेन्सी – ला लिगाको बहुप्रतिक्षित बार्सिलोना र रियल म्याड्रिडबीच बुधबारको गोलरहित बराबरीमा टुंगिएको थियो । राजतिनिक कारणले यसअघि तय खेल रद्द भएको थियो । एल क्लासिकोको नाममा समेत परिचित यी दुई टोलीबीचको खेलमा रियल ३ अंक लिन असफल भयो ।

तर, टोलीका लागि सबैभन्दा प्रभावशाली रहे गेराथ बेल । रियलका लागि सिजनकै सबैभन्दा ठूलो खेलमा बेल त्यसरी प्रभाव छाड्न सफल होलान् भन्ने कतिलाई अनुमान नहुनु पनि सक्छ । प्रशिक्षक जिनेदिन जिदानले उनलाई पहिलो रोजाईमा राख्दा नै केहि आश्चार्यमा परेका थिए । बेलले मौकालाई खेर जान दिएनन् ।

गोल गर्न नसकेपनि उनी खेलमा प्रभाव छाड्न सफल भए । उनको क्रसमा फेर्लान्ड मेन्डी थोरै अफ साइड भएका थिए । पछिल्लो साता बेलका लागि सुखद थिएन । तर बार्सिलोनाविरुद्ध उनले जस्तो प्रदर्शन गरे त्यसले टोलीमा उनको महत्वलाई दर्शाएको छ । क्लब ब्रुगेसँगको खेलका लागि बेल बेल्जियम पुगेका थिए । तर उनले त्यहाँ खेल्न पाएनन् । ३० वर्षे उनी रोड्रिगो गोस भन्दा पछाडि मात्र जिदानको रोजाईमा पर्ने गर्छन् ।

तर, फ्रान्सेली प्रशिक्षकले बुधबार एल क्लासिकोमा बेललाई पहिलो रोजाईमा राखे । पेरिस सेन्ट जर्मेन (पिएसजी) सँग २–२ बराबरीमा टुंगिएको खेलमा जस्तै बार्सिलोनाविरुद्ध लगभग त्यहि टोली थियो । त्यसमा इडन हाजार्ड घाइते भएपछि बेललाई मैदान प्रवेश गराइएको थियो ।
बार्सिलोनासँगको गोलरहित बराबरीपछि जिदानले बेलको खुलेर प्रशंसा गरेका छन् । ‘उनले उत्कृष्ट प्रदर्शन गरे,’ जिदानले भने ।

हाजार्डको अनुपस्थितिमा बेल फर्ममा फर्कनु रियलका लागि सुखद समाचार हो । पछिल्लो केहि समयदेखि एकरुपताको प्रदर्शन गर्न नसकेको रियलका लागि बेलको प्रदर्शनले केहि राहत दिएको हुनुपर्दछ । पछिल्लो प्रदर्शनले गर्दा बेलले आउने दिनमा मौका पाउने सम्भावना बढेको छ ।