एजेन्सी – रहिम स्ट्रलिङको दुई गोल सहयोगमा प्रिमियर लिग क्लब म्यानचेस्ट सिटीले लिग वान क्लब अक्सफोर्ड युनाइटेडलाई पराजित गर्दै इंग्सिल लिग कप (इएफल) को सेमिफाइनलमा स्थान बनाएको छ ।

दि कासाम स्टेडियम अक्सफोर्डमा बुधबार राति भएको क्वाटरफाइनलमा सिटीले घरेलु टोली अक्सफोर्डलाई ३–१ ले पराजित गर्दै अन्तिम चारमा पुग्न सफल भएको हो । सिटीका जोओ क्यान्सेलोले एक गोल थपे । अक्सफोर्डका माट टेलरले एक गोल फर्काए ।

खेलको २२औं मिनेटमा क्यान्सेलोको गोलबाट सिटीले पहिलो हाफमा १–० को अग्रता बनाएको थियो । दोस्रो हाफको शुरुमै माट टेलरले गोल गर्दै घरेलु टोलीलाई खेलमा फर्काएका थिए ।

तर, त्यसपछि सिटीका रहिम चम्किए । ५०औं मिनेटमा स्ट्रलिङले गोल गर्दै सिटीलाई २–१ को अग्रता दलाए । ७०औं मिनेटमा स्ट्रलिङले व्यक्तिगत दोस्रो गोल गर्दै सिटीलाई ३–१ को जित दिलाए ।

अर्काे क्वाटरफाइनलमा म्यानचेस्टर युनाइटेडले लिग टु को क्लब कोलचेस्टर युनाइटेडलाई ३–० ले पराजित गर्दै सेमिफाइनलमा पुग्न सफल भएको छ । युनाइटेडको जितमा मार्कुस रासफोर्ड र एन्थोनी मार्सियलले गोल गरे । एक गोल उपहार पाएको थियो ।

अर्काे क्वाटरफाइनलमा लेस्टर सिटीले एभर्टनलाई पेनाल्टी सुटआउटमा ४–२ ले पराजित गर्दै अन्तिम चारको यात्रा तय गर्न सफल भएको छ । निर्धारित समयको खेल २–२ गोलको बराबरी भएको थियो । निर्धारित समयमा लेस्टरका जेम्स म्याडिसन र जोनी इभान्सले गोल गरे । एभर्टनका टोम डेभिस र लिथनले गोल गरे ।

पेनाल्टीमा लेस्टरका बेन चिलवेल, रिकार्डाे पेरेरा, डिमाराई ग्रे र जेमी भार्डीले गोल गरे । जेम्स म्याडिसन चुके । एभर्टनका मसान होलगेट र डोमिनिकले मात्र गोल गर्न सफल भए । सेन्ट टुसन र लिथन गोल गर्न असफल रहे ।