एजेन्सी – रियल म्याड्रिड र बार्सिलोना सिजनको पहिलो एल क्लासिकोका लागि तयार छन् । तर यी दुई टोली जब भिड्छन् त्यो एउटा समान्य खेल मात्र रहँदैन । क्लबका खेलाडी मात्र होइन समर्थकमा पनि भिन्नै खालको इगो रहन्छ ।

कतिपयले यी दुई टोलीको भिडन्तलाई तनाबको विषय पनि मान्छन् । त्यसलाई मथ्थर पार्ने प्रयासमै होला रियलका प्रशिक्षक जिनेदिन जिदानले दर्शकले दुई प्रतिस्पर्धी टोलीबीचको राम्रो फुटबल हेर्न चाहेको बताएका छन् । यद्दपी यी दुई टोलीबीचको खेलअघि सुरक्षालाई विशेष ध्यान दिइएको छ । जिदानले भने सबै ध्यान मैदानमा केन्द्रित हुने विश्वास लिएका छन् ।

‘मैदान बाहिर यो साता निकै चर्चा भएको छ । तर जनता राम्रो फुटबल हेर्न चाहन्छन्,,’ प्रि म्याच कन्फ्रेन्समा जिदानले भने,‘ खासमा हामी आफ्नो सबै शक्ति मैदानमा लगाउने छौं । हामीलाई लाग्छ राम्रो खेल हुनेछ ।’

रियलका लागि अधिकांश खेलमा लियोनल मेस्सी जितको बाधक रहँदै आएका छन् । यद्दपी जिदान अर्जेन्टिनी खेलाडीका विषयमा मात्र सोच्न चाहदैनन् । उनले मेस्सीविरुद्ध कुनै योजनाका बारेमा पनि बोल्न चाहेनन् । ‘ यो फुटबल खेल हो । त्यो महत्वपूर्ण हो,’ उनले भने,‘ हामीलाई थाहा छ हामी कसको सामना गर्दैछौं । हामीलाई थाहा छ उनीहरुसँग मेस्सी छ । तर हामीसँग पनि हाम्रो हतियार छन् । हामी बार्सिलोनाविरुद्ध उत्कृष्ट फुटबल खेल्न चाहन्छ । उनीहरु पनि त्यहि चाहन्छन् ।’

एल क्लासिको यसअघि नै भइसक्नुपर्ने थियो । तर काटालोनियाको राजनितिक कारणका कारण त्यति बेला रद्द गरिएको थियो । बुधबार पनि तनाब हुने सम्भावना छ । जिदानले खेल अबरुद्ध हुन सक्ने सम्भावनामा केहि बोल्न चाहेनन् । ‘मेरो यसमा केहि भनाई छैन । मैले अरु बारेमा सोच्नु आवश्यक छैन । मेरो काम भनेको मैदानमा हुने खेलका बारेमा सोच्ने हो,’ उनले भने,‘ हामी खेल्नका लागि तयार भएका आएका छौं । हाम्रो चासो त्यसैमा हो । हामी कुनै पनि विषयमा चिन्तित छैनौं । हामी क्लासिको खेल्नका लागि खुसी छौं । ’

जिदानले आफ्नो पहिलो प्रशिक्षण कार्यकालमा कासिमारोलाई रियलको सिनियर टोलीमा उतार्दै मास्टरस्ट्रोक खेलेका थिए । अहिले फेरि उनी फेडे भाल्भेर्डेलाई लिएर अर्को मास्टरस्ट्रोक खेल्ने तयारीमा रहेको अनुमान गरिएको छ । भाल्भेर्डेको प्रदर्शनको अहिले चर्चा हुन थालेको छ ।

‘हामीले भाल्भेर्डेलाई भेट्टाएका छौं । उनी केहि राम्रो चिज गरिरहेका छन् । त्यो क्लबका लागि महत्वपूर्ण हुन सक्छ । हामीसँग सधै उत्कृष्ट खेलाडी हुन्छन्,’ उनले भने,‘ हेरौ के हुन्छ । हामी भोलीको खेलका लागि केन्द्रित छौं । केहि निर्णय लिन बाँकी छन् ।’