एजेन्सी – क्रिस्टियानो रोनाल्डोका एजेन्ट जोर्गे मेन्डेसले रियल म्याड्रिडमै बसेको भए रोनाल्डोले पछिल्लो दुई सिजनमा कम्तिमा एक ब्यालोन डी’ओर जित्न सक्ने बताएका छन् ।

रोनाल्डो सन् २०१८ मा रियल छोडेर इटालियन क्लब युभेन्टस पुगेका थिए । त्यसयता २०१८ मा मोड्रीच र त्यसपछि लिओनेल मेस्सीले यस सिजन उपाधि जिते । मेन्डेसले रोनाल्डो रियलमा नै बसेको भए उक्त उपाधि रोनाल्डोले जित्न सक्ने बताए ।

‘रोनाल्डोले पछिल्लो दुई सिजनमा कम्तिमा एक पटक उपाधि जित्न पर्थ्यो,’ उनले इटालियन पत्रिका टुटोस्पोर्टसँग भने, ‘ उनले रियलमा बसेको भए जित्थे होला । तर अब अर्को सिजन उनले जित्न सक्छन् । मलाई लाग्दैन यो उनको लागि न्याय भयो । उनले नेसन्स लिगको उपाधि पनि जिते । अब उनलाई थाहा छ सन् २०२० मा के गर्नुपर्छ ।’

मेन्डेसले रोनाल्डो फुटबल इतिहासकै उत्कृष्ट खेलाडी रहेको पनि बताए । ‘रोनाल्डो इतिहासकै उत्कृष्ट खेलाडी हुन्,’ रोनाल्डोले थपे, ‘पोर्चुगलले रोनाल्डो खेल्नुअघि केहि जितेको थिएन । रोनाल्डो आएपछि युरो कप र नेसन्स लिगको नै उपाधि जित्यो । त्यसअघि २००४ को युरोमा पनि फाइनल खेल्यो ।

‘रोनाल्डोले विश्व फुटबलको नै वातावरण परिवर्तन गरेका छन् । पोर्चुगल त सानो उदाहरण जसले रोनाल्डोको आगमनपछि रुप फेरेको छ ।’