एजेन्सी – ब्राजिलियन प्लेमेकर फिलिपे कोउटिन्होको ह्याट्रिक मद्दतमा बायर्न म्युनिखले जर्मन बुन्डेस लिगामा सानदार जित निकालेको छ । बायर्नले वेर्डर ब्रेमेनमाथि ६–१ को फराकिलो जित निकालेको हो ।

घरेलु मैदानमा बायर्नको फराकिलो जितमा कोउटिन्होको ह्याट्रिकसँगै रोवर्ट लेवान्डोस्कीले दुई तथा थोमस मुलरले एक गोल गरे । ब्रेमेनका मिलोट रासिकाले सान्त्वना गोल गरे ।

खेलको २४औं मिनेटमा रासिकाको गोलबाट वेर्डर ब्रेमेनले खेलमा अग्रता लिएको थियो । ४५औं मिनेटमा कोउटिन्होले बराबरी गोल फर्काए । पहिलो हाफको इन्ज्युरी समयको थप गरिएको चौथो मिनेटमा रोवर्ट लेवान्डोस्कीले गोल गरेपछि बायर्नले खेलमा २–१ को अग्रता लिन सफल भयो ।

६३औं मिनेटमा कोटिन्होले व्यक्तिगत दोस्रो गोल गर्दा बायर्नले खेलमा ३–१ को अग्रता लिन सफल भयो । ७२औं मिनेटमा लेवान्डोस्कीले व्यक्तिगत दोस्रो गोल गरेपछि बायर्न खेलमा सहज जिततर्फ अग्रसर बन्यो ।

७५औं मिनेटमा थोमस मुलरले गोल गरेपछि बायर्नले ५–१ को आरामदायी अग्रता लियो । ७८औं मिनेटमा कोटिन्होले ह्याट्रिक पुरा गर्दै बायर्नलाई ६–१ को सानदार जित दिलाए । जितसँगै बायर्न १५ खेलबाट २७ अंक जोडेर चौथो स्थानमा उक्लिएको छ ।

यता, अर्काे खेलमा बोरुसिया डर्टमन्डले मेइन्जमाथि ४–० को फराकिलो जित निकालेको छ । डर्टमन्डको जितमा मार्काे रिउस, जाडोन सान्चो, थोर्गन हजार्ड र निको स्कुल्जले गोल गरे ।

जितसँगै डर्टमन्ड १५ खेलबाट २९ अंक जोडेर तेस्रो स्थानमा उक्लिएको छ । आरबी लेइप्लिज ३३ अंकसहित शीर्षस्थानमा तथा एक खेल कम खेलेको बोरुसिया मोन्चेनग्लाडवाच ३१ अंक जोडेर दोस्रो स्थानमा छ ।