एजेन्सी – मर्सिसाइड क्लब लिभरपुलले इंग्लिस प्रिमियर लिगमा अपराजित यात्रालाई निरन्तरता दिदा शनिबार साँझ वाटफोर्डलाई पराजित गरेको छ । घरेलु मैदान एनफिल्डमा लिभरपुलले वाटफोर्डमाथि २–० को जित निकालेको हो ।

लिभरपुलको अपराजित यात्रामा शनिबार राति मोहम्मद सलाहले दुवै गोल गरे । प्रिमियर लिगमा लिभरपुल १७ खेलसम्म अपराजित रहन सफल भएको छ । यसक्रममा लिभरपुलले १६ खेलमा जित र एक बराबरीको नतिजा निकालेको छ ।

यस्तै लिभरपुलले जित निकालेसँगै उपाधि होड थप बलियो बनाएको छ । १७ खेलबाट ४९ अंक जोडेको लिभरपुलले दोस्रो स्थानको लेस्टर सिटीलाई ११ अंकले पछि पारेको छ । यद्दपि लेस्टरले एक खेल कम खेलेको छ ।

वाटफोर्डलाई दवावमा राखेपनि लिभरपुलले गोलको लागि ३८औं मिनेट कुर्नुपरेको थियो । खेलको ३८औं मिनेटमा साडियो मानेको पासमा सलाहले गोल गर्दै लिभरपुललाई अघि बढाएका थिए । सलाहले कर्नरबाट काउन्टर अट्याकमा आएको पासलाई सदुपयोग गर्दै सानदार गोल गरे ।

दोस्रो हाफमा पनि लिभरपुलले वाटफोर्डलाई दवावमा राखेपनि थप गोलको लागि निकै संघर्ष गर्नुपरेको थियो । ९०औं मिनेटमा डिभोक ओरिगीको पासमा सलाहले व्यक्तिगत दोस्रो गोल गर्दै लिभरपुललाई २–० को जित दलाए । उनले ब्याकहिलमा विपक्षी डिफेन्डरलाई उत्कृष्ट  नटमेग गर्दै गोल गरेका थिए । हारपछि वाटफोर्ड ९ अंक जोडेर रेलिगेसन जोनको पुछारमा छ ।