पोखरा (हाम्रो खेलकुद) – नेपाली महिला राष्ट्रिय फुटबल टोली १३ अौं दक्षिण एसियाली खेलकुद अन्तर्गत महिला फुटबल प्रतियोगितामा रजत पदकमा सिमित भएको छ ।

पोखरा रंगशालामा सोमबार भएको फाइनलमा नेपाल भारतसँग २-० ले पराजित भयो । भारतका लागि बाला देवीले २ गोल गरिन् ।

१६ औं मिनेटमा सावित्रा भण्डारीले पेनाल्टी क्षेत्र बाहिरबाट गरेको प्रहार भारतकी डिफेन्डर स्विटी देवीले ब्लक गरिन् । उक्त ब्लकपछि काउन्टर अट्याकमा दाङमेइ ग्रेसको प्रहारले पोस्टको दिशा लिन सकेन ।

१८ औं मिनेटमा भारतले अग्रता लियो । डिफेन्स र गोलरक्षकबीच तालमेल नमिल्दा बालादेवीले गोल गर्दै भारतलाई अगाडि बढाइन् ।

३४ औं मिनेटमा अमृता जैसीको क्रसमा भारतीय गोलरक्षक अदिति चौहानले बल छुटाएपछि सावित्राको क्रसलाई बाला देवीले क्लियर गरिदिइन् ।

४२ औं मिनेटमा पुन: गोलरक्षक एन्जिला र डिफेन्सबीच तालमेल नमिल्दा ग्रेसले खाली पोस्ट रहेको अवस्थामा गरेको प्रहार पोस्टभन्दा थोरै परबाट बाहिरियो ।

दोस्रो हाफको सुरुवातमै नेपालले अग्रता लिने अवसर पायो । सावित्रा भण्डारीले पेनाल्टी क्षेत्रभित्र तीन डिफेन्डरलाई बिट गर्दै गरेको प्रहारलाई गोलरक्षक अदितिले उत्कृष्ट बचाउ गरिन् । त्यसको केहिबेरमा नै भारतले अग्रता दोब्बर पार्यो । बालादेवीले पेनाल्टी क्षेत्र भित्रबाट गोल गर्दै भारतलाई स्वर्ण पदक नजिक पुर्याइन् ।