पोखरा (हाम्रो खेलकुद) – नेपाली महिला राष्ट्रिय फुटबल टोलीले १३ औं दक्षिण एसियाली खेलकुद (साग) अन्तर्गत महिला फुटबलको फाइनलमा भारतविरुद्ध खेल्दैछ । खेल पोखरा रंगशालामा दिउँसो २ बजे सुरु हुनेछ ।

समूह चरणको अन्तिम खेलमा नेपाल भारतसँग १-० ले पराजित भएको थियो । उक्त खेलको पहिलो हाफको बालादेवीले गरेको गोल नै निर्णायक सावित भयो । भारतले एकमात्र गोल गरेपनि खेलको अधिकांश समय नेपालले दवाव बनाएको थियो । गोलरक्षक एन्जिला तुम्बापो सुब्बाले बिरलै बल बचाउनुपरेको थियो ।

पछिल्लो समय नेपाल र‌ भारतबीच निकै प्रतिस्पर्धात्मक खेल हुँदै आएको छ । विगतमा अौपचारिकता जस्तो रहने खेल हिजोआज दुवै टोलीमा अन्तर खासै देखिन्न । नेपालले अघिल्लो वर्ष भारतमै भएको हिरो गोल्डकपमा भारतलाई हराउँदै फाइनलमा पुगेको थियो । त्यसयता नेपाल र भारतबीच नेपालमै‌ पनि खेल भयो,‌‌‌ तर दुर्भाग्यवश नेपाल फाइनलमा पराजित हुन पुग्यो ।

नेपाली टोलीलाई पोखरामा पुन: एकपटक इतिहास रच्ने अवसर छ । भारतलाई हराउन सके नेपालले महिला फुटबलमा पहिलो अन्तर्राष्ट्रिय उपाधि भित्र्याउने छ । यसका लागि टोली पनि तयार छ । पोखरेली समर्थकमाझ साग स्वर्ण दिलाउन फरवार्ड सावित्रा भण्डारीमाथि निकै अपेक्षा राखिएको छ ।