एजेन्सी – कप्तान लियोनेल मेस्सीले ह्याट्रिक प्रहार गरेपछि क्याटलान क्लब बार्सिलोनाले स्पेनिस ला लिगा अन्तर्गत शनिबार मायोर्कालाई पराजित गर्दै लिगको शीर्षस्थानमा फर्किएको छ ।

बार्सिलोनाले मायोर्कामाथि ५-२ को जित दर्ता गर्दा मेस्सीले ३ तथा लुइस सुआरेज र एन्टोइन ग्रिज्मनले १-१ गोल थपे । खेलको सातौं मिनेटमा बार्सिलोनाले ग्रिज्मनको गोलमा अग्रता लिएको थियो । गोलरक्षक मार्क आंदर टेर स्टेगनको लामो पासमा मायोर्काको डिफेन्सको गल्तिको फाइदा उठाउँदै उनले गोल गरेका थिए ।

मेस्सीले १७ औं मिनेटमा बार्सिलोनाको अग्रता दोब्बर पारे । उनले पेनाल्टी क्षेत्र बाहिर बल नियन्त्रणमा लिँदै उत्कृष्ट गोल गरे । लगत्तै सुआरेजले सर्जी रोबर्टोको कटब्याक पासमा राम्रो प्रहार गरेपनि क्रसबार गोलको बाधक बन्यो । यद्यपि ३५ औं मिनेटमा साल्भा सेभिलाको क्रसमा अन्ते बुडिमिरले गोल गर्दै खेलमा मायोर्कालाई फर्काए ।

पहिलो हाफको अन्त्यतिर मेस्सीले बार्सिलोनाको २ गोलको अग्रता पुन: स्थापना गरे । उनले ४१ औं मिनेटमा उत्कृष्ट फिनिसको नमुना प्रस्तुत गर्दै विपक्षी गोलरक्षकलाई बचाउने कुनै मौका दिएनन् । लगत्तै सुआरेजले ब्याकहिलमा गोल गर्दै बार्सिलोनालाई ४-१ ले अगाडी बढाए ।

दोस्रो हाफमा पनि बार्सिलोनाले एकपक्षी दवाव कायम राख्यो । यसबीच काउन्टर अट्याकमा मायोर्काले बुडिमिरबाट नै अर्को गोल फर्कायो । तर मेस्सीले खेलको ७ मिनेट बाँकी रहँदा आफ्नो ह्याट्रिक पूरा गर्दै जित पक्का गरे ।

यस जितसँगै बार्सिलोनाले १५ खेलमा ३४ अंकसहित शीर्षस्थान कब्जा गरेको छ । समान खेलमा समान अंक बोकेको रियल म्याड्रिड गोलअन्तरले पछाडी रहेको छ । सेभिल्लाको १५ खेलमा ३० तथा रियल सोसिडाड र एथलेटिक बिल्बाओको २६ अंक छ ।