पोखरा (हाम्रो खेलकुद)– १३ औं दक्षिण एसियाली खेलकुद (साग) अन्तर्गत महिला फुटबलमा भारतविरुद्ध खेल्नु अघिल्लो दिन नेपाली टोलीकी व्यवस्थापक पेमा डोल्मा लामा श्रेष्ठले खेलाडीको उत्साह बढाउन ट्रयाकसुट प्रदान गरेकी छिन् । श्रेष्ठ टोलीका खेलाडी तथा अफिसियाल गरि कुल २६ लाई एक एक सेट केल्मीको ट्रयाकसुट प्रदान गरेकी हुन् ।

फाइनलमा पुगिसकेका नेपाल र भारतबीच आज राउन्ड रोविन लिगमा प्रतिस्पर्धा हुनेछ । दुवैले अघिल्ला दुवै खेल जित्दै अन्तिम दुईको यात्रा तय गरेको थियो । दुवैको समान ६ अंक छ । दुवैले श्रीलंका र माल्दिभ्सलाई हराएका र्थि । नेपालले पहिलो खेलमा श्रीलंकालाई १–० र अर्को खेलमा माल्दिभ्समा ३–० ले हराएको थियो ।

भारतले पहिलो खेलमा माल्दिभ्सलाई ५–० र श्रीलंकालाई ६–० ले हराएको थियो । दुवै खेल गुमाएका श्रीलंका र माल्दिभ्स र गोलअन्तरका आधारमा श्रीलंका तेस्रो र माल्दिभ्स चौथो स्थानमा रहेका छन् । आजै श्रीलंका र माल्दिभ्स राउण्ड रोविनको अन्तिम खेल खेल्दै छन् ।

नेपाली टोलीका मुख्य प्रशिक्षक हरि खड्काले भारतसँग फाइनल खेल्नुअघि उसको बलियो र कमजोर पक्ष केलाउने अवसर मिल्ने बताएका छन् । उनले घरेलु मैदानमा स्वर्ण पदक जित्ने मौका आएको र त्यसका लागि टोली तयार रहेको बताएका छन् ।