एजेन्सी – डिफेन्डर भर्जिल भान डाइकले दुई गोल गरेसँगै मर्सिसाइड क्लब लिभरपुलले इंग्लिस प्रिमियर लिग फुटबलमा ब्राइटन होभ अल्बियोनलाई पराजित गर्दै शीर्षस्थानलाई थप पकड बनाएको छ । १० खेलाडीमा समेटिएको लिभरपुलले ब्राइटनमाथि २–१ को जित निकालेको हो ।

जितसँगै साविको उपविजेता लिभरपुलले दोस्रो स्थानको म्यानचेस्टर सिटी र लेस्टर सिटीलाई ११ अंकले पछि पारेको छ । लेस्टरले एक खेल कम खेलेको छ । लिभरपुलको १४ खेलबाट ४० अंक रहेको छ । समान खेलबाटै सिटीको २९ अंक रहेको छ । एक खेल कम खेलेको लेस्टर सिटीको पनि २९ अंक छ ।

एनफिल्डमा शनिबार राति भएको खेलको १८औं मिनेटमा भर्जिल भान डाइकको गोलबाट घरेलु टोली लिभरपुलले खेलमा अग्रता बनाएको थियो । उनले ट्रेन्ट एलेक्सजेन्डर अर्नाेल्डको पासमा गोल गरेका थिए । २४औं मिनेटममा अर्नाेल्डकै पासमा भान डाइकले गोल गर्दै लिभरपुलको अग्रता दोब्बर पारे ।

दोस्रो हाफ लिभरपुलको राम्रो हुन नसकेपनि खेल आफ्नो पक्षमा पार्न सफल भयो । ७६औं मिनेटमा लिभरपुल १० खेलाडीमा समेटियो । एडम वेवस्टेरको लामो पासलाई बक्स बाहिर ह्यान्ड गरेपछि रेफ्रीले गोलरक्षक एलिसन बेकरलाई रातो कार्ड देखाउदै मैदान बाहिर पठाएका थिए । त्यसको तीन मिनेटपछि नै लिभरपुलले गोल खान पुथ्गदा खेल २–१ को स्थितिमा आएको थियो । ७९औं मिनेटमा कप्तान लेविस डंकले गोल गरे ।

त्यसपछि थप गोल निस्कन नसक्दा लिभरपुल २–१ ले विजयी हुन सफल भयो । हारसँगै ब्राइटन १५ अंक जोडेर १५औं स्थानमा छ ।