एजेन्सी – इंग्लिस क्लब चेल्सी र स्पेनिस क्लब भ्यालेन्सियाले युइएफए च्याम्पियन्स लिग फुटबलमा रोमाञ्चक बराबरी खेलेको छ । चेल्सी र भ्यालेन्सियाले २–२ गोलको रोमाञ्चक बराबरी खेल्दै अंक बाँडेको हो ।

चेल्सीका माटियो कोभासिस र क्रिस्टियन पुलिसिसले गोल गरे । घरेलु टोली भ्यालेन्सियाका कार्लाेस सोलेर र ड्यानियल वासले गोल गरे ।
भ्यालेन्सियामा बुधबार राति भएको खेलमा घरेलु टोलीले ४०औं मिनेटमा कार्लाेस सोलेरको गोलबाट अग्रता बनाएको थियो । त्यसको एक मिनेट बित्न नपाउदै चेल्सीका माटियो कोभासिसले बराबरी गोल फर्काएका थिए ।

५०औं मिनेटमा क्रिस्टियन पुलिसिसले गोल गरेपछि चेल्सीले खेलमा २–१ को अग्रता बनाएको थियो । ६५औं मिनेटमा घरेलु टोली भ्यालेन्सियाले बराबरीको सुन्दर मौका खेर फाल्यो । ड्यानियल पारेजोले पेनाल्टीमा गोल गर्न सकेन । तर, ८२औं मिनेटमा ड्यानियल वासले बराबरी गोल फर्काए । त्यसपछि थप गोल निस्कन नसक्दा खेल २–२ गोलको बराबरीमा सकियो ।

बराबरीसँगै चेल्सीको चेल्सी ५ खेलबाट ८ अंक जोडेर तेस्रो स्थानमा छ । समान ८ अंक भएपनि भ्यालेन्सिया गोल अन्तरमा दोस्रो स्थानमा छ । १० अंकसहित डच क्लब आयाक्स शीर्ष स्थानमा छ । समुह ‘एच’ मा आयाक्स, भ्यालेन्सिया र चेल्सीको नकआउट चरणमा पुग्ने सम्भावना छ ।

यही समूहको अर्काे खेलमा डच क्लब आयाक्सले फ्रेन्च क्लब लिलमाथि २–० को जित निकालेको छ । जितसँगै आयाक्सले नकआउट चरण पुग्ने सम्भावना जीवितै राखेको छ । अब समूहको अन्तिम खेलमा आयाक्सले भ्यालेन्सिया तथा चेल्सीले लिलसँग खेल्नेछ ।