एजेन्सी – इंग्लिस क्लब लिभरपुल र इटालियन क्लब नेपोलीले युइएफए च्याम्पियन्स लिगमा बराबरी खेल्दै अंक बाँडेका छन् । लिभरपुल घरेलु मैदानमा नेपोलीसँग १–१ गोलको बराबरीमा रोकिएको हो ।

एनफिल्डमा घरेलु टोली लिभरपुलले एक गोलले पछि परेको स्थितिमा खेलमा फर्कंदै बराबरीको नतिजा निकालेको हो । लिभरपुलका डेजान लभरेन तथा नेपोलीका ड्रिस मर्टेन्सले गोल गरे ।

खेलको २१औं मिनेटमा मर्टेन्सको गोलबाट लिभरपसुल पहिलो हाफमा १–० ले पछि परेको थियो । दोस्रो हाफमा लिभरपुलले बराबरी गोल फर्काउन सफल भयो । ६५औं मिनेटमा लभरेनले गोल गर्दै खेललाई १–१ गोलको बराबरीमा ल्याए । त्यसपछि थप गोल निस्कन नसक्दा खेल बराबरीमा सकियो ।

बराबरीसँगै समूह ‘ई’ मा लिभरपुल ५ खेलबाट १० अंक जोडेर शीर्षस्थानमा स्थानमा यथावत रहेको छ । नेपोली ९ अंकसहित दोस्रो स्थानमा छ ।

यही समूहको अर्काे खेलमा साल्जवर्गले जेन्कमाथि ४–१ को सानदार जित निकालेको छ । साल्जवर्गको जितमा पास्टोन डाका, ताकुमी मिनामिनो, हि चान ह्वाङ र अर्लिङ ब्राउट हल्यान्डले गोल गरे । जेन्कका लागि एमबीवाना समताले एक गोल फर्काए ।

जितसँगै साल्जवर्गको ५ खेलबाट ७ अंक जोडेर नकआउट चरण पुग्ने सम्भावना जीवितै राखेको छ । जेन्क १ अंकसहित पुछारमा छ । अझैपनि समूहबाट नकआउट चरणमा पुग्ने टोलीको टुंगो लागेको छैन । लिभरपुललाई अन्तिम चरणको खेलमा कम्तिमा बराबरी आवश्यक रहेको छ ।