टुलुज (एजेन्सी)– रसियामाथि ३–० को जित निकाल्दै वेल्स युरोपियन च्याम्पियनसिपअन्तर्गत समूह बीको विजेता बनेको छ । आज बिहानैको अर्को खेलमा इङ्ल्यान्ड र स्लोभाकियाले गोलरहित बराबरी खेलेपछि वेल्स समूहको विजेताका रुपमा अन्तिम १६ मा प्रवेश गरेको छ । इङ्ल्यान्ड समूह उपविजेता बन्दै नकआउट चरणमा पुगेको छ ।

वेल्सका गेराथ बेल ।

वेल्सको ६, इङ्ल्यान्ड ५ अंक छ । स्लोभाकियाले भने अघि बढ्नका लागि सबै समूहको खेलको नतिजा कुर्नुपर्ने हुन्छ । छ वटा समूहका विजेता र उपविजेता स्वतः नकआउटमा पुग्नेछन् । छ समूहका उत्कृष्ट तेस्रो टोलीमध्ये ४ टोली पनि अन्तिम १६ मा जानेछन् । १ अंक जोडेको रसिया प्रतियोगिताबाट बाहिरएको छ ।
अघिल्लो खेलमा इङ्ल्यान्डसँग २–१ ले पराजित भएपछि वेल्सले रसियासँगको खेल सुरुआतबाट दबाबमा राखेको थियो । आरोन रामसेले ११ औं मिनेटमै टोलीलाई अग्रता दिलाएका थिए । जो एलेनको सहयोगमा उनले गोल गरे । निल टेलरले २० औं मिनेटमा गोल थपे । अघिल्ला दुई खेलमा फ्रिकिकमार्फत गोल गरेका रियल मड्रिडका गेराथ बेलले रामसेको पासमा गोल गरे । त्यो गोलले उनलाई जारी प्रतियोगिताको सबैभन्दा बढी गोल गर्ने खेलाडी समेत बनाएको छ । वेल्सले अब कुनै समूहको तेस्रो हुने टोलीसँग शनिबार क्वार्टरफाइनल प्रवेशका लागि प्रतिस्पर्धा गर्नेछ ।