एजेन्सी – कप्तान ह्यारी केनको दुई गोलसँगै इंग्लिस क्लब टोटेनहमले युइएफए च्याम्पियन्स लिगको नकआउट चरणमा पुग्न सफल भएको छ । टोटेनहमले ग्रीसको ओलम्पियाकोसमाथि ४–२ को पूनरागमन जित निकाल्दै एक खेल बाँकी रहँदा च्याम्पियन्स लिगको नकआउट चरणमा पुग्न सफल भएको हो ।

जितसँगै समूह ‘बी’ बाट टोटेनहमले ५ खलेबाट ९ अंक जोड्यो । । रेडस्टार बेलग्रेड ३ अंकसहित तेस्रो तथा ओलक्पियाकोस १ अंक जोडेर पुछारमा छ । अपराजित रहेको बायर्न ५ खेलबाट १५ अंक जोडेर शीर्षस्थानमा रहँदै नकआउट चरणका पुग्न सफल भइसकेको छ ।

टोटेनहम हस्टपर स्टेडियममा मंगलबार राति भएको खेलमा घरेलु टोलीको जितमा डेल अली र सर्जी औरियरले गोल गरे । ओलम्पियाकोसका युसेफ इएल अरबी र रुवेन सेमेडोले गोल गरे ।

खेलको छैटौं मिनेटमा युसेफको गोलबाट टोटेनहम पछि परेको थियो । १९औं मिनेटमा रुवेनले गोल गर्दा घरेलु टोली २–० ले पछि परेको थियो । पहिलो हाफका इन्ज्युरी समयका डेल अलीले गोल गर्दै घरेलु टोलीलाई खेलमा फर्काउने संकेत दिएका थिए ।

दोस्रो हाफमा केन चम्किएपछि टोटेनहमले पूनरागन जित निकाल्न सफल भयो । ५०औं मिनेटमा ह्यारी केनले बराबरी गोल फर्काए । ७३औं मिनेटमा सर्जी औरियरले गोल गरेपछि टोटेनहमले खेलमा ३–२ को अग्रता लिन सफल भयो । ७७औं मिनेटमा कप्तान केनले व्यक्तिगत दोस्रो गोल गरेपछि टोटेनहम ४–२ ले विजयी हुन सफल भयो ।