एजेन्सी – च्याम्पियन्स लिगको समूह चरणको पहिलो खेलमा रियल म्याड्रिड पराजित भएपछि टोलीको यो सिजन कठिन हुने धेरैको अनुमान थियो । त्यति बेला फ्रेन्च टोली पेरिस सेन्ट जर्मेन (पिएसजी) ले घरेलु मैदानमा रियलमाथि ३–० को रवाफपूर्ण जित निकाल्दा त्यो अनुमान गलत थिएन ।

तर, दुई महिनापछि फेरि एक पटक यी दुई टोलीबीच भेट्दा रियलको त्यति बेलाको छवि केहि बदलिएको छ । तथापी बलियो पिएसजीविरुद्ध भने सचेन हुनपर्नेछ । पिएसजीसँगको खेलपछि समूह चरणका ३ खेलमा रियल अपराजित छ । २ खेलमा जित र १ खेलमा बराबरी गर्दै ७ अंक जोडेको रियल दोस्रो स्थानमा छ । सबै ४ खेल जितेको पिएसजी १२ अंकसहित शीर्षस्थानमा छ ।

आज राती आफ्नो मैदानमा हुने खेलमा रियल तयार रहेको देखिन्छ । टोलीका फेडे भाल्भेर्डे र रोड्रीगोको लय विपक्षीका लागि खतरा बन्न सक्छ । चेल्सीका लागि निकै प्रभाव जमाएका इडेन हाजार्ड भने रियलमा अझै आफ्नो उत्कृष्ट लयमा फर्कन सकेका छैनन् । लुका मोड्रिच चोटग्रस्त छन् भने कप्तान रामोस प्रतिबन्धमा छन् । यस्ता कारणले रियल केहि केहि कमजोर पक्कै छ ।

त्यसका वावजुद पनि रियल नकआउटको नजिक पुगिसकेको छ । २ र १ अंकका जोडेका क्लब ब्रुग र गालाटासारेबीच पनि आजै खेल हुँदैछ । पिएसजीका लागि केलियन एमबाप्पे र नेयमारले सुरुवात गर्ने निश्चित छ । त्यस्तै रियलका पूर्व गोलकिपर नाभास पिएसजीको प्रमुख भूमिकामा रहनेछन् ।