एजेन्सी – यूईएफए च्याम्पियन्स लिग अन्तरर्गत समूह डी को खेलमा मंगलबार इटालियन च्याम्पियन युभेन्टस र एटलेटिको म्याड्रिड भिड्दैछन् । खेल नेपाली समयअनुसार बुधबार विहान १:४५ बजे सुरु हुनेछ ।

युभेन्टसका प्रशिक्षक माउरिजियो सार्रीले इटालियन लिग अन्तर्गत शनिबारको खेलमा सुपरस्टार फरवार्ड क्रिस्टियानो रोनाल्डोलाई विश्राम दिएका थिए । उनले एटलेटिकोविरुद्ध च्याम्पियन्स लिगको लागि रोनाल्डोलाई शत प्रतिशत तयार राख्नकै लागि यो कदम चालेका हुन् । एटलान्टाविरुद्ध चोट बोकेका मिडफिल्डर फेडेरिको बर्नार्डेस्की यस खेलका लागि उपलब्ध हुने छैनन् । उनको स्थानमा आरोन राम्जीले खेल्ने सम्भावना रहेको छ ।

ब्राजिलियन डिफेन्डर एलेक्स स्यान्ड्रो पनि पछिल्लो खेल गुमाएपछि पुनरागमनको प्रतीक्षामा छन् । जुआन क्वाडराडो भने युरोपेली प्रतियोगिताको प्रतिबन्धपछि खेलका लागि उपलब्ध छन् ।चोटका कारण डिफेन्डर जिओर्जियो किएलीनी, मार्को प्याका र माटिया परिन उपलब्ध छैनन् । मिडफिल्डर एम्रे च्यान पनि टोलीमा रहेका छैनन् ।

यता एटलेटिकोलाई पनि चोटका कारण डिफेन्समा निकै समस्या परेको छ । सेन्टर डिफेन्डर जोसे जिमिनेज, स्टेफान साभिच र सिमे भर्साल्को घाइते छन् । फरवार्ड डिएगो कोस्टा पनि चोटका कारण बाहिर छन् । मिडफिल्डर थोमस पार्टे र सौल निगुएज लिगको पछिल्लो खेल गुमाएपछि मैदान फर्कंदैछन् । जोआओ फेलिक्स पनि चोटबाट पुनरागमन गरेपछि युभेन्ट्सविरुद्ध पहिलो रोजाईमा खेल्न संघर्षरत छन् । यस खेललाई रोनाल्डो र फेलिक्सको लडाईंको रुपमा पनि हेरिएको छ ।

युभेन्टस च्याम्पियन्स लिगको नकआउट चरणमा पुगिसकेको छ । समूहको शीर्षस्थानमा १० अंक जोडेको इटालियन टोली एटलेटिकोभन्दा ३ अंकले अगाडि छ । युभेन्ट्सले यस सिजन घरेलु मैदानमा खेलेको सबै ८ खेलमा जित दर्ता गरेको छ । एटलेटिकोले भने घरबाहिर खेलेका पछिल्ला ५ खेलमा ४ खेल बराबरी गरेको छ । म्याड्रिड टोलीले पछिल्लो ५ खेलमा नै गोल खाएको छ ।

यी दुई टोलीबीचको पछिल्लो भेट २-२ को बराबरीमा सकिएको थियो । उक्त खेलमा युभेन्टसले अवे मैदानमा २-० को अग्रता लिएपनि जोगाउन सकेको थिएन ।

सम्भावित सुरुवाती ११ :

युभेन्टस (४-३-१-२)

वोजचिएक सेचेज्नी

जुआन क्वाडराडो – लिओनार्डो बोनुची – माथिस डे लिग्ट – एलेक्स स्यान्ड्रो

ब्लेस माटूइडी – मिरालेम प्यानिच – सामी खेडिरा

आरोन राम्जी

गोन्जालो हिगुआइन – क्रिस्टियानो रोनाल्डो

एटलेटिको म्याड्रिड (४-४-२)

यान ओब्लाक

सान्टियागो अरियास – मारियो हेर्मोसो – फेलिपे – रेनान लोडी

कोके – थोमस पार्टे – सौल निगुएज – लेमार

जोआओ फेलिक्स – अल्भारो मोराटा