एजेन्सी – रियल म्याड्रिडलाई महत्वपूर्ण सफलता दिलाउनमा भूमिका खेलेका वेल्सका स्टार गेराथ बेल स्पेनमा खासै प्रिय बन्न सकेनन् । कहिले चोट र कहिले प्रशिक्षक जिनेदिन जिदानसँगको खटपटका कारण उनी आलोचित पनि बन्दै आएका छन् । पछिल्लो पटक युरो कपका लागि वेल्स छनोट भएपछि उनको हर्कतले क्लबका समर्थकलाई निराश बनाएको थियो ।

वेल्सका समर्थकले ल्याएको वेल्स, गल्फ, म्याड्रिड लेखेको ब्यानर समातेर तस्बिर खिचेर उनी पुनः विवादमा परेका छन् । त्यसका वावजुद अन्तर्राष्ट्रिय विश्राम पछि उनी रियलको प्रशिक्षणमा फर्केका छन् । महिना दिन भन्दा लामो समयपछि रियलका अन्य सहकर्मीसँग उनले अभ्यास गरेका छन् । पछिल्लो पटक उनले अक्टोबर १४ मा टोलीसँग अभ्यास गरेका थिए ।

वेल्ससँग हुँदाको घटना पछि पनि उनी शनिबार ला लिगामा रियल सोसिडाडसँग हुने खेलका लागि टोलीमा छन् । यद्दपी उनी पहिलो रोजाईमा पर्ने खेल्न पाउने नपाउने निश्चित भईसकेको छैन । कम्तीमा उनी उपलब्ध रहने भन्ने पक्का भइसकेको छ । टोलीको प्रशिक्षणमा बिहीबार फर्कनेमा बेल मात्र छैनन् ।

उनीसँगै कप्तान सिर्जियो रामोस, इडन हाजार्ड, थिबाउट कोर्टियोस, टोनी क्रुस, इडर मिलिटाओ र रोड्रीगो गोएस पनि प्रशिक्षणमा सामेल भएका छन् । लुकास भाज्केज भने बायाँ खुट्टामा चोटका कारण मैदान बाहिर नै छन् । नाचो फर्नान्डेज मैदानमा फिट हुनका लागि प्रयास गरिरहेका छन् । त्यस्तै मार्सेलो र हामेस रोड्रिग्वेज जिममा अभ्यास गर्न थालेका छन् ।

यो पनि पढ्नुहोस् : ‘वेल्स, गल्फ म्याड्रिड’