एजेन्सी – इंग्लिस क्लब लिभरपुलका मिडफिल्डर जिओर्जिनियो वाइनाल्डमको ह्याट्रिक सहयोगमा नेदरल्यान्ड्सले युरोकप छनोटको समूह चरणको अन्तिम खेलमा इस्टोनियामाथि ५–० को फराकिलो जित निकालेको छ ।

घरेलु मैदानमा मंगलबार राति भएको खेलमा नेदरल्यान्डका लागि नाथन एके र माइरन बोअदुले समान एक गोल थपे । एकपक्षीय खेलमा घरेलु टोली नेदरल्यान्डले पहिलो हाफमा २ तथा दोस्रो हाफमा ३ गोल गर्न सफल भएको थियो ।

खेलको छैटौ मिनेटमा वाइनाल्डमको गोलबाट नेदरल्यान्डले खेलमा अग्रता बनायो । १९औं मिनेटमा नाथन एकेले गोल गरेपछि नेदरल्यान्डले पहिलो हाफमा २–० को अग्रता लियो । ६३औं मिनेटमा वाइनाल्डमले व्यक्तिगत दोस्रो गोल गरे । ७८औं मिनेटमा वाइनाल्डमले ह्याट्रिक पुरा गर्दै नेदरल्यान्डलाई ४–० को आरामदायी अग्रता दिलाए । ८७औं मिनेटमा माइएरनले गोल गर्दै नेदरल्यान्डलाई ५–० को फराकिलो जित दिलाए ।

जितसँगै नेदरल्यान्डले समूह ‘सी’ मा ८ खेलबाट १९ अंक जोड्दै दोस्रो स्थानमा रहेर छनोटको अन्त्य गर्‍यो । इस्टोनिया १ अंकसहित पुछारमा रह्यो ।

यही समूहको अर्काे खेलमा शीर्षस्थानमा रहेको जर्मनीले नर्दन आयरल्यान्डमाथि ६–१ को जित निकाल्दै छनोटको सुखद् अन्त्य गरेको छ । जर्मनीको फराकिलो जितमा सर्जी जिनाब्रीले ह्याट्रिक पूरा गरे । लियोन गोरेट्जकाले दुई तथा जुलियन ब्रान्डले एक गोल थपे ।

जर्मनीले ८ खेलबाट २१ जोड्यो । नर्दन आयरल्यान्ड १३ अंकसहित तेस्रो स्थानमा रह्यो । बेलारुस ४ अंकसहित तेस्रो स्थानमा रह्यो ।