एजेन्सी – युरोकप २०२० मा स्थान बनाइसकेको स्पेनले समुह चरणमा आफ्नो अपराजित यात्रालाई कायमै राख्दा शुक्रबार राति माल्टामाथि फराकिलो जित निकालेको छ ।

स्पेनमा भएको खेलमा घरेलु टोलीले माल्टामाथि ७–० को फराकिलो जित निकालेको हो । स्पेनको जितमा ७ खेलाडीले नै गोल गरे । अल्भेरो मोराटा, सान्टी कार्जाेला, पोउ टोरेस, पाब्लो साराविया, ड्यानियल ओल्मो, जेरार्ड मोरेनो र जेसस नाभासले गोल गरे ।

एकपक्षीय खेलमा स्पेनको खेलको २३औं मिनेटमा मोराटाको गोलबाट अग्रता लिएको थियो । ४१औं मिनेटमा कार्जाेलाले गोल गर्दै स्पेनलाई पहिलो हाफमा २–० को अग्रता दिलाए ।

स्पेनको गोल गर्ने क्रम दोस्रो हाफमा रोकिएन । ६२औं मिनेटमा टोरेस र ६३औं मिनेटमा सारावियाले गोल गरेपछि स्पेन खेलमा ४–० ले अघि बढ्यो । ६९औं मिनेटमा ओल्मोले गोल गर्दै स्पेनलाई फराकिलो जिततर्फ अग्रसर गराए । ७१औं मिनेटमा मोरेनोले तथा ८५औं मिनेटमा नाभासले गोल गर्दै स्पेनलाई ७–० को फराकिलो जित दिलाए ।

जितसँगै अपराजित रहेको स्पेनले समूह ‘एफ’ मा ९ खेलबाट २३ अंक जोडेर शीर्षस्थानमा छ । पराजित माल्टा ३ अंकसहित पुछारमा छ ।
यही समूहको अर्काे खेलमा स्वीडेनले रोमानियालाई २–० ले पराजित गर्दै युरोकपमा स्थान बनाएको छ । स्वीडेनको जितमा मार्कुस वर्ग र रविन क्वाइसनले गोल गरे । स्वीडेनको ९ खेलबाट १८ अंक छ । समान खेलबाटै रोमानियाको १४ अंक छ ।

यही समूहको अर्काे खेलमा नर्वेले फारोह आइल्यान्डलाइै ४–० ले पराजित गरेको छ । नर्वेको १४ तथा आइल्यान्डको ३ अंक छ ।