एजेन्सी – कप्तान क्रिस्टियानो रोनाल्डोले ह्याट्रिक प्रहार गरेपछि युरो कप छनोट अन्तर्गत समूह ‘बी’ को खेलमा पोर्चुगलले लिथुआनियामाथि ६-० को फराकिलो जित दर्ता गरेको छ ।

रोनाल्डोले खेलको सातौँ मिनेटमा पेनाल्टीमार्फत गोल गर्दै पोर्चुगललाई अग्रता दिलाएका थिए । लिथुआनियाका सौलिउस मिकोलिउनासले रोनाल्डोलाई पेनाल्टी क्षेत्रभित्र लडाएपछि पोर्चुगलले पेनाल्टी पाएको थियो । रोनाल्डोले उक्त पेनाल्टीलाई सिधै बीचमा प्रहार गर्दा गोलरक्षक अर्नेस्तास सेत्कुसको खुट्टामा लाग्दै गोलमा परिणत भएको थियो ।

खेलको २३ औं मिनेटमा रोनाल्डोले पोर्चुगलको अग्रता दोब्बर पारे । लिथुआनियाले मिडफिल्डमा बल गुमाएपछि मिडफिल्डर प्यासीएन्सियाले रोनाल्डोलाई पास दिए । रोनाल्डोले झन्डै २५ मिटर टाढाबाट गरेको शक्तिशाली प्रहारलाई गोलरक्षक सेत्कुसले बचाउने भेउ नै पाएनन् । लगत्तै रोनाल्डोको प्रहार सेत्कुसले बचाए भने उनको अर्को प्रहार पोस्टभन्दा माथिबाट बाहिरियो ।

दोस्रो हाफको सुरुवाती ११ मिनेटमा पोर्चुगलले तीन गोल थप्यो । पिज्जी, प्यासीएन्सिया र बर्नार्डो सिल्भाले गोल गर्दै पोर्चुगललाई फराकिलो जिततर्फ उन्मुख गराए । रोनाल्डोले खेलको ६५ औं मिनेटमा आफ्नो ह्याट्रिक पुरा गरे । उनले सिल्भाको पासलाई गोलमा परिणत गर्दै करीअरको ५५ औं ह्याट्रिक प्रहार गरेका हुन् ।

रोनाल्डोले यस ह्याट्रिकसँगै पोर्चुगलका लागि अन्तर्राष्ट्रिय गोल संख्या ९८ पुर्याएका छन् । अब उनी आफ्नो राष्ट्रका लागि १ सय गोल गर्ने दोस्रो खेलाडी हुने उपलब्धि नजिक छन् । यसअघि इरानका अली दाइले मात्र यो उपलब्धि हासिल गरेका थिए । रोनाल्डोले पोर्चुगलका लागि मात्र ९ पटक ह्याट्रिक प्रहार गरेका छन् ।

क्लब फुटबलमा युभेन्ट्सका लागि लगातार दुई खेल परिवर्तन भएका रोनाल्डोमा बिहीबारको खेलमा भने कुनै किसिमको समस्या देखिएन । यसअघि क्लबका प्रशिक्षक माउरिजियो सार्रीले रोनाल्डोको घुँडामा समस्या रहेको भनेपनि रोनाल्डोले उत्कृष्ट प्रदर्शन गरे । पोर्चुगलका प्रशिक्षक फर्नान्डो सान्तोसले पनि रोनाल्डोमाथि कहिल्यै कुनै शंका नरहेको र उनीमाथि पुर्ण विश्वास रहेको अभिव्यक्ति दिए ।

यस जितसँगै पोर्चुगल ७ खेलमा १४ अंक बोकेर अंक तालिकाको दोस्रो स्थानमा रहेको छ । समूह ‘बी’ को शीर्षस्थानमा रहेको युक्रेन १९ अंकसहित युरोको लागि छनोट भइसकेको छ । पोर्चुगलले आइतबार हुने खेलमा लक्जेमबर्गलाई पराजित गरे छनोट पक्का गर्नेछ । सर्बियाको १३ अंक छ भने लक्जेमबर्गको ४ र लिथुआनियाको १ अंक मात्र छ ।