एजेन्सी – मर्सिसाइड क्लब लिभरपुलले इंग्लिस प्रिमियर लिग फुटबलमा म्यानचेस्टर सिटीलाई सहजै पराजित गरेको छ । घरेलु मैदानमा लिभरपुलले सिटीलाई ३–१ को गोल अन्तरमा पराजित गरेको हो ।

सिटीमाथिको सहज जितसँगै लिभरपुलले अंक तालिकामा ८ अंकको स्पष्ट अग्रता बनाएको छ । प्रिमियर लिगमा अपराजित रहेको लिभरपुलले १२ खेलबाट ३४ अंक जोडेको छ । दोस्रो स्थानको लेस्टर सिटीको समान खेलबाट २६ अंक छ । २६ अंक नै रहेको चेल्सी तेस्रो तथा २५ अंक जोडेको म्यानचेस्टर सिटी चौथो स्थानमा यथावत छ ।

घरेलु मैदानमा सिटीलाई लज्जास्पद हार चखाउन फाविन्हो, मोहम्मद सलाह र साडियो मानेले गोल गरे । सिटीका बर्नाडो सिल्भाले सान्त्वना गोल फर्काए । लिभरपुलले खेलको छैटौं मिनेटमा नै फाविन्होको गोलबाट सिटीविरुद्ध अग्रता बनाएको थियो । फाविन्होले झन्डै २५ यार्डबाट गरेको सशक्त प्रहार सिधै गोलमा परिणत भएको थियो ।

१३औं मिनेटमा एन्ड्रिउ रोबर्टसनको पासमा मोहम्मद सलाहले हेडमार्फत गोल गर्दै लिभरपुलको अग्रता दोब्बर पा¥यो । पहिलो हाफमा २–० को अग्रता लिएको लिभरपुलले दोस्रो हाफमा थप एक गोल गर्न सफल भयो ।

५१औं मिनेटमा साडियो मानेले जोर्डन हेन्डरसनको क्रस पासमा पावरफुल हेडर गोल गरेपछि लिभरपुलले खेलमा ३–० को आरामदायी अग्रता लियो । ७८औं मिनेटमा बर्नार्डाे सिल्भाले गोल गर्दै सिटीलाई खेलमा फर्काउने संकेत दिएका थिए ।त्यसपछि पनि सिटीले केही सुन्दर मौका सदुपयोग गर्न नसक्दा सिटी लिभरपुलसँग ३–१ ले पराजित हुन पुग्यो ।

हारसँगै सिटीले दोस्रो स्थानमा उक्लने मौका गुमाएको छ । प्रिमियर लिगमा सिटीको यो दोस्रो हार हो ।