एजेन्सी – जेमी भार्डी र जेम्स म्याडिसन चम्कदा लेस्टर सिटीले इंग्लिस प्रिमियर लिग फुटबलमा लन्डन क्लब आर्सनलमाथि २–० को जित निकालेको छ । दुवै गोल दोस्रो हाफमा सम्भव भएको थियो ।

आर्सनलमाथिको महत्वपुर्ण जितसँगै लेस्टर प्रिमियर लिगको दोस्रो स्थानमा उक्लन सफल भएको छ । लेस्टरले चेल्सी र एक खेल कम खेलेको म्यानचेस्टर सिटीलाई पछि पार्दै दोस्रो स्थानमा उक्लन सफल भएको हो । लेस्टरको १२ खेलबाट २६ अंक छ । समान २६ अंक नै रहेपनि लन्डन क्लब चेल्सी तेस्रो तथा २५ अंकसहित सिटी चौथो स्थानमा छ ।शीर्षीस्थानको लिभरपुलको ३१ अंक छ ।

प्रतिस्पर्धात्मक पहिलो हाफ गोलरहित बराबरीमा सकिएको थियो । ६८औं मिनेटमा जेमी भार्डीले गोल गर्दै खेलमा गोलको खडेरी अन्त गरे । उनले टिलेमान्सको पासलाई सदुपयोग गर्दै लेस्टरलाई अग्रता दिलाएका थिए । ७५औं मिनेटमा भार्डीको पासमा म्याडिसनले गोल गर्दै लेस्टरलाई २–० को जित दिलाए ।

हारसँगै आर्सनलका व्यवस्थापक युनाई इम्रीमाथि दवाव बढेको छ । आर्सनलले २२ सेप्टेम्वरमा एस्टन भिल्लालाई ३–२ ले पराजित गरेयता प्रिमियर लिगमा जित हात पार्न सकेको छैन । त्यसयता आर्सनलले ३ बराबरी र २ हार बेहोरेको छ । आर्सनल १२ खेलबाट १७ अंक जोडेर छैटौ स्थानमा छ ।

प्रिमियर लिगकै अर्काे खेलमा टोटेनहम सेफिल्डसँग १–१ गोलको बराबरीमा रोकिएको छ ।