एजेन्सी – ब्राजिलियन फरवार्ड ग्याब्रियल जेसस पेनाल्टीमा चुक्दा इंग्लिस क्लब म्यानचेस्टर सिटी इटालियन क्लब एटलान्टासँग बराबरीमा रोकिएको छ । मिलानो इटालीमा १० खेलाडीमा समेटिएको सिटी घरेलु टोलीसँग १–१ गोलको बराबरीमा रोकिएको हो ।

बराबरीसँगै सिटी दुई खेल अगावै च्याम्पियन्स लिगको नकआउट चरणमा पुग्नबाट वञ्चित बनेको छ । खेलको सातौ मिनेटमा नै रहिम स्ट्रलिङले गोल गर्दै सिटीलाई अग्रता दिलाएका थिए । बर्नाडो सिल्भाको पासमा जेससले पेनाल्टी बक्समा मिलाईदिएको पासलाई रहिमले गोल गरेका थिए ।

४३औं मिनेटमा जेससले पेनाल्टीमा गोल गर्न सकेनन् । बक्सबाहिर प्राप्त फ्रिकिकमा एटलान्टाका खेलाडीले ह्यान्ड गरेपछि रेफ्रीले भिएआरको सहायतामा सिटीलाई पेनाल्टीको मौका दिएको थियो । तर, जेसस पेनाल्टी प्रहार पोस्टबाट थोरै बाहिरिएको थियो ।

दोस्रो हाफको शुरुमै घरेलु टोलीले मारियो पासालिकले बराबरी गोल फर्काए । ८१औं मिनेटमा सिटी १० खेलाडीमा समेटियो । सिटीका परिवर्तित गोलरक्षक क्लाउडियो ब्राभोले जोसिप इलिसिसलाई फल गरेपछि रेफ्रीले ब्राभोलाई रातो कार्ड दिएका थिए । त्यसपछि सिटीको पोस्ट डिफेन्डर केल वाल्करले सम्हालेका थिए । उनले केही राम्रो बचाउ गरेका थिए ।

बराबरीसँगै सिटी समूह ‘सी’ मा ४ खेलबाट १० अंक जोडेर शीर्षस्थानमा यथावत छ । शाख्तर डोनेस्क र डाइनामो जाग्रिवको समान ५ अंक छ । एटलान्टाले पहिलो अंक जोडेको छ । यही समूहमा साख्तर र डाइनामोले ३–३ गोलको बराबरी खेल्दै अंक बाँडे ।