एजेन्सी – फ्रेन्च लिग वान क्लब पेरिस सेन्ट जर्मेन (पीएसजी) युइएफए च्याम्पियन्स लिग फुटबलको नकआउट चरणमा प्रवेश गरेको छ । बुधबार राति भएको खेलमा बेल्जियन क्लब ब्रगलाई १–० ले पराजित गर्दै पीएसजीले समूहमा दुई खेल बाँकी छदै समूह ‘ए’ बाट नकआउट चरणमा पुग्न सफल भएको हो ।

अब बाँकी दुवै खेलमा पराजित भएपनि पीएसजीलाई कुनै फरक पर्नेछैन । अपराजित रहेको पीएसजीले समूह ‘ए’ मा ४ खेलबाट १२ अंक जोड्यो । पार्क डि प्रिन्सेस पेरिसमा घरेलु टोलीलाई जिताउन मौरो इकार्डीले गरेको गोल नै निर्णायक बन्यो । इकार्डीले खेलको २२औं मिनेटमा कोलिन डग्वाको पासमा गोल गर्दै पीएसजीलाई अग्रता दिलाएका थिए ।

प्रतिस्पर्धात्मक बनेको खेलमा क्लब ब्रगले दोस्रो हाफमा पाएको पेनाल्टीलाई सदुपयोग गर्न सकेन । ७६औं मिनेटमा एमबाय डियाग्नीको पेनाल्टीलाई पीएसजीका गोलरक्षक केलर नाभासले बचाइदिए । ७४औं मिनेटमा थियागो सिल्भाले डियाग्नीलाई फल गरेपछि रेफ्रीले भिएआरको सहायतामा क्लब ब्रगलाई पेनाल्टीको मौका दिएको थियो । तर, नाभासले सिल्भाको गल्तीलाई माफ गरिदिए ।

त्यसपछि थप गोल निस्कन नसक्दा पीएसजी १–० ले विजयी रहन सफल भयो । पराजित क्लब ब्रग २ अंक जोडेर तेस्रो स्थानमा छ । यही समूहको अर्काे खेलमा स्पेनिस क्लब रियाल मड्रिडले टर्किस क्लब गालाटासारेमाथि ६–० को प्रभावशाली जित निकालेको छ ।

रियालको फराकिलो जितमा युवा फरवार्ड रोड्रिगोले ह्याट्रिक पुरा गरे । करिम बेन्जेमाले दुई तथा कप्तान सर्जियो रामोसले एक गोल थपे । जितसँगै रियाल ७ अंक जोडेर दोस्रो तथा गालाटासारे १ अंक जोडेर पुछारमा छ ।